Aruba, Curaçao i Sint Maarten durante e di dos konsulta di Arikok a firma e komunikado konhunto di Santa Martha. Ku esaki ta lanta un komishon hurídiko i unu stratégiko.

E di dos konsulta a tuma lugá na lanthùis Groot Santa Martha na Kòrsou. Aña pasá e promé konsulta a tuma lugá na parke Arikok na Aruba. Ei a palabrá e Akuerdo di Arikok kaminda e tres paisnan lo bai kooperá mas tantu ku otro.

E komishon hurídiko, ku lo kuminsá mesora ku su trabounan, lo eksplorá e terenunan riba kua e tres paisnan por kolaborá ku otro. Ademas di esei lo e investigá konsekuenshanan hurídiko di nasementu di paisnan outónomo Kòrsou i Sint Maarten pa e areglo anterior di koperashon entre Antia ulandes i Aruba i e protokòlnan konserniente.

Kooperashon soshal-ekonómiko
E komishon stratégiko, ku tambe lo start direktamente, a haña komo tarea pa formulá un kuadro general pa un forma nobo di kooperashon entre Kòrsou, Aruba i Sint Maarten, dirigí riba kreashon di un sinergia mas grandi, entre otro pa medio di kooperashon soshal-ekonómiko, ku e meta pa realisá un mihó kalidat di bida i bienestar pa habitantenan di e paisnan.

E komishonnan ta haña e tarea tambe pa mira kon prolongá e kooperashon ku Union Europeo despues di 31 di desèmber 2013. A palabrá agènda tambe pa e próksimo konferensha di Reino di 14 di desèmber. Kòrsou i Sint Maarten ke pa regla den Statüt ku e paisnan nobo lo por bira independiente si tin nesesidat pa esei. Aktualmente esei ta konta solamente pa Aruba.

Download aki e Komunikado konhunto di Santa Martha