Awe Redakshon Karibense di Wereldomroep a start sali ku Aki na Hulanda, un magazine diario di 30 minüt ku notisia i aktualidat, i ku ta transmití di djaluna te ku djasabra. Tur esaki ta koïnsidí ku redukshon di transmishon di e programa na ulandes, Linea Recta ku djawe padilanti lo dura 30 minüt na lugá di e 45 minütnan kustumbrá. 

E programa Aki na Hulanda ta ofresé notisia i reportahe for di komunidat Antiano i Arubano na Hulanda, porsupuesto den idioma Papiamentu. Fuera di esei ta introdusí un rúbrika di muzik bou di e título 'Primera Segunda', den kua ta eksponé muzik antiano di antaño, esta di añanan 50/60. Lo dediká atenshon tambe na un kolekshon musikal antiano ku te awor tabata wardá den archivo di Radio Nederland Wereldomroep.

E boletin di notisia i resúmen di korant na papiamentu, ku semper por a skucha den e último dies minütnan di Linea Recta, a pasa pa e programa nobo akí ku konosé un duo-presentashon, o sea un programa ku dos lokutor.

Nos ta spera bo reakshon gustosamente i nos ta habrí pa kualke informashon òf tep al kaso ku nos por dal bai kune den e programa nobo akí.

Roy Khemradj
Hefe di sekshon Karibense

Akibou por mira fragmento di estreno di Aki na Hulanda. Seguidamente un entrevista di kamarógrafo Patrick Dorder (na ulandes í papiamentu) ku lokutornan Belkis Osepa i Rita van der Heul i ku Désirée Martis, kende a dirigí e promé entrega di Aki na Hulanda.