Stilbènt ta mashá na moda atrobe. Tin un interes kresiente pa stilpèn òf panchi, instrumento musikal típiko di Karibe, ku ta trahá  di drùm bieu di zeta. Siman pasá Edgar Connor National Youth Steelpan Academy a habri su porta na Aruba, e instituto ta bai siña hubentut kon pa toka panchi.
 
E Academy ta karga nòmber di e hòmber ku a popularisá panchi rònt Aruba. El a lanta su yu i nietunan ku amor pa panchi, nan a toka durante apertura di e Akademia.
 
E skol di stilpèn ta forma parti di Universidad Karibense (Caribbean University), un instituto privá na Aruba. Ku  e akademia nobo akí, direktor Frank Zaandam ke bolbe lanta interes pa patrimonio kultural di Aruba. El a ripará ku tabatin masha interes, pero ku no tabatin inisiativa pa funda un skol kaminda por siña toka panchi. Ku su universidat e ta yena e bashí ku tabatin. 
 
Persona mashá apart
A nombra e Academy na defuntu Edgar Connor. Frank Zaandam ta bisa di dje: E tabata un di e personanan mas partikular riba tereno di panchi na Aruba. E tabata un di e pioneronan, loke ta hasié asina spesial ta ku fuera di tabata tokadó di panchi, e tabata kompositor tambe i e mes tabata traha e panchinan. Su yu i nietunan ta sigui ku e tradishon di panchi i ta pesei mes nan a toka durante e anochi di apertura. Zaamdam ta haña mashá spesial ku tin kuater generashon di músiko, pasó e tata di Edgar tambe tabata toka. 
 
Reakshon entusiasmá
Mashá hende a presensiá e  apertura. Ta remarkabel ku hopi hende  a bini di San Nicolas, kaminda kuna di panchi na Aruba ta pará. Nan ta haña e inisiativa pa un skol di panchi 'fantástiko'. Un bishitante muhé ta bisa: 'Mi a nase na San Nicolas i den mi hubentut semper mi a skucha müzik di stilpèn.'
 
E anochi ta laga rekuerdo bieu rebibá serka un hòmber. E ta refutá ku panchi lo ta un instrumento di hende pober. 'Mi ta kere ku e tabata pa un i tur : pa riku, pober, pasó ta müzik mashá bunita mes'. Un hende muhé ta señalá ku tradishon di stilbènt tabata moribundo. 'Wak delaster Karnaval, ei tabatin poko stilbènt. Mi tabata puntra mi mes ta unda e kos ei lo bai para pero for di awor nos por ta kontentu ku lo e tei atrobe'.
 
Dinastia musikal di Connor 
Nietu Quincy Connor di diessinku aña a lanta di chikitu ku stilpèn. Ora ku su tata Lee Connor a ripará ku su yu hòmbernan tabatin interes, el a kuminsá duna nan lès. Quincy ta toka müzik klásiko tambe riba piano, meskos ku stilpèn e ta un instrumento di melodia. Segun Quinci por kombiná nan masha bunita mes, si toka akort riba piano i e melodia riba panchi.
 
Su tata Lee Connor ta bai duna lès na e Academy. El a yega di duna basta tayer kaba. Tabatin asina tantu interes ku e ta buskando un lugá mas grandi, pa e por organisá tayer pa turista tambe. Lee Conner ta un tokadó apashoná di panchi i e ta hinka tur su alma den e variashonnan ku e ta hasi di kantika eksistente.