Den e lunanan benidero Hulanda i e islanan BES mester yega na un akuerdo tokante e haltura di pagonan sosial riba e islanan, manera penshun di behes i ònderstant. Te ainda Boneiru, Statia i Saba ta haña e proposishonnan di minister Donner muchu abou. Esaki segun Hans Bor, un di e dos prekursornan di e ministerio hulandes di Asuntunan Sosial, ku ta preparando e transishon di e islanan pa bira munisipio ekstra-ordinario.

Tanten Bor a bishitá e islanan kuater be i di tur manera lo keda na Boneiru te na e transishon riba 10-10-'10. A pidi'é bin hasi e trabou aki ounke ku el a stòp di traha kaba. E tabata sa mas o menos unda e islanan BES tabata keda, ma ei a kaba tambe. Entretantu el a entusiasmá mas i mas, i poko poko a kuminsá siña Papiamentu.

'Konteksto karibense'
Den e legislashon sosial di e islanan BES lo usa e asina yamá "konteksto karibense" pa determiná haltura di e pagonan sosial. Ke men ku penshun di behes, ònderstant i sueldo mínimo lo no ta meskos ku na Hulanda. "Nos lo sali for di loke ta paga aktualmente riba e islanan i tira algu ariba", asina Bor ta bisa.

E islanan ke sa kon ta bai determiná e haltura di e diferente pagonan i tanten ta ninga di bai di akuerdo ku e proposishonnan hulandes. Ademas Hulanda ke duna tur tres isla mes tantu, ma Saba i Statia ta mustra ku nan nivel di preis ta mas haltu ku na Boneiru.

E negoshashonnan entre gobièrnunan insular i minister Donner di Asuntunan Sosial, mas lat den e aña aki mester resultá den akuerdonan definitivo ora e minister bai Antia. Ke men e desishonnan lo mester kai riba nivel polítiko. Bor, ku komo prekursor ta pará poko den banda, ta bisa sí ku Hulanda mes lo bin hañ'é ku ekonomisashonnan grandi i esaki sigur lo tin influensha.

Mas opheshon
Boneiru a laga sa di tin opheshon kontra e echo ku permitnan di estadia i di trabou tambe lo kore via ministerio - esta Regionale Service Centra (RSC). Te awor ta e islanan mes ta regla e asuntu. Pero segun Bor na Hulanda tampoko e kos aki no ta un asuntu munisipal i ademas e islanan mes a bai di akuerdo ku esaki na 2008. "Apsolútamente ímposibel" ku esaki lo por kambia, segun Bor.

E prekursor ta haña ku no mester surgi un bataya riba ken ta hasi kiko, kaminda RSC lo enfrentá e islanan. "Nos mester yuda otro". Por ehempel no por ehekutá un maneho di ònderstant lòs di e isla.

Na Saba i Statia e RSCnan ta chikí i pa mayoria nan lo traha trabou di "front-office'. Bor ta realisá ku Boneiru no por bira un Willemstad nobo, kaminda ta tuma desishonnan for di un distansha grandi for di e otro islanan. E dos islanan mas chiki ya kaba a ekspresá nan miedu di esaki. Por segun Bor lo hasi tur loke ta posibel pa no laga distansha ta un problema ora por ehempel un hende na Saba hasi un petishon pa penshun di behes.