Lider polítiko Jopie Abraham di Partido Demokrátiko Boneriano (PDB) ke un investigashon dje formashon dje gobièrnu aktual di Boneiru pa limpia su nòmber di tur akusashon. El a hasi e petishon akí den un karta na minister antiano di Hustisia Magali Jacoba, prokurador general Dick Piar i gobernador Frits Goedgedrag.

Den e karta e ta ninga tur akusashon di supuesto involukrashon di soborno i enrikesimentu propio. E ta sugerí ku serka otro partido sí lo tin kuestion di práktikanan di korupshon, prinsipalmente serka e partido di gobièrnu anterior, UPB di Ramonsito Booi.

Antilliaans Dagblad a plantia e akusashon di korupshon ora el a publiká un lista di deseo dje miembro di UPB Anthony Nicolaas ku a bòltu. Na 2008 el lo a pidi Abraham 500.000 florin antiano pa laga e gobièrnu anterior kai i sostené PDB.

Krísis di gobièrnu
Abraham ta haña ku un investigashon ta na su lugá, pasobra su nòmber ta na diskushon. "Tabatin un krísis di gobièrnu i mester a bin un bestürkolezje nobo. Nos a negoshá ku Nicolaas." For di esei a sali un akuerdo, sino Hulanda mester a intervení, segun Abraham. Sino un gobièrnu nobo no tabata posibel. E echo ku Nicolaas a yega haña un sentensia pa violensha doméstiko no a hunga un ròl, segun Abraham.
 

E kambio di pensamentu di Nicolaas tokante e futuro estatal di Boneiru ta segun e lider di PDB un asuntu personal. E no ta wak nada straño den esei. Entretantu no ta hasi nada na e akusashonnan na adrès di Ramoncito Booi di UPB, ku ta haña sosten finansiero di CDA. Serka dje a listra su kas: "E ta sospechoso, pero no ta bisa nada di esei."
 

Hans Hillen
Konsehero pa CDA Hans Hillen lo a bula bai kuater biá Boneiru riba kosto dje bestürkolzje anterior via di Bonaire Holding Maatschappij. "Sin niun kontra prestashon visibel. Niun kaminda no tin un desishon ku a nombra Hillen komo konsehero." Mester investigá esei tambe, segun Abraham.

Hillen ta bisa den un reakshon ku e tabata forma parti di un konseho di asesoramentu (komishon di sabionan), huntu ku otro prominentenan manera èks gobernador Jaime Saleh, èks promé miniser Miguel Pourier i èks gezaghèber Richard Hart. El a ofresé su servisionan tambe na e bestürskolezje nobo, pero nan a gradis'é pa esaki. Hillen a konfirmá ku e por a biaha riba kostonan dje bestürkolezje anterior, pero den e mas ku sinku aña komo konsehero, el a biaha no mas ku ocho biá.

Elekshon
Abraham no ta preokupá ku resultado dje elekshon di Staten di dia 22 di yanüari. Segun Abraham e elekshonnan no tin niun balor, pasobra Staten lo sinta solamente mei aña. E referèndem di mart tokante e futuro estatal di Boneiru ta muchu mas importante p'e.