Jopi Abraham lo no sigui komo líder polítiko di Partido Democrático Boneriano (PDB). No muchu tempu pasá el a pone su funshon disponibel kaba i djasabra awor e ke entregá e martin di presidente na un líder nobo pa e partido kòrá.

“Ku e relashonnan estatal nobo i elekshonnan pa Konseho Insular den maart 2011 ta parsemi e momentu apropiá pa pasa e antorcha pa otronan. Partido tin hopi kandidato ku ta bini na remarke pa e liderasgo nobo”, Abraham ta haña.

Niun nòmber
E no ta menshoná niun nòmber pasobra segun e ta Reunion General mester skohe un hende. Ounke e lo ta disponibel pa konseho i posibelmente e lo saka su opinion den publisidat de bes en kuando, e no ta deseá niun funshon mas den polítika aktivo.

“Esaki ta un retiro total di mi for di e akontesimentunan polítiko na Boneiru. Durante 33 aña, ku un interupshon kòrtiku, mi a sirbi interesnan públiko segun un ideologia sosial-demokrátiko. Mi a ehersé kasi tur funshon di responsabilidat ku ta eksistí – di sindikalista te minister i Parlamentario.

‘Koman-Dante’
“Ku mi 62 aña di edat mi ke transponé mi atenshon pa dediká mas tempu na mi famia. Tambe lo mi bai piska mas tantu i gosa na otro manera di e presioso isla ku ta Boneiru”, Abraham ta konta. Por ehèmpel: djaluna e ke selebrá e di kuater aniversario di su yu Dante Ernesto Abraham ‘ku de bes en kuando ta komportá su mes kom ‘koman-Dante’’.

Abraham ta deklará enfátikamente ku e ‘no ta un payaso’ ni un ‘Heintje Davids boneriano’, ku ta anunsiá ku e ta bandoná polítika pa un ratu despues blo atrobe bisando ku ‘ta hende a rogami’: “Ami no ta hasi wega. Ta un desishon serio esaki ta”.

Investigashon
Riba e pregunta ku si su retiro tin di aber ku investigashonnan hudisial ku tin andando riba e isla di flamingo, Abraham ta indiká di ‘no ta komprondé e pregunta’: “Tin hopi investigashon hudisial andando na Boneiru aktualmente pero niun miembro di PDB ta involukrá den eseinan. Pa esaki bo mester ta serka UPB kaminda, manera ta konosí, Ramonsito Booi i Burney Elhage ta mirá komo sospechoso dor di Ministerio Públiko”.

Sharlon Monart di redakshon Willemstad di Wereldomroep a entrevistá Jopie Abraham