Raymond Labad, presidente di MAAPP i Glenn Helberg, presidente di OCaN tabatin un enkuentro ku alkalde Aboutaleb di Rotterdam. Motibu di e kòmbersashon tokante komunidat antiano na Rotterdam ta loke Aboutaleb a bisa resientemente den vários medio di komunikashon enkuanto kriminal antiano.

Siman pasá e alkalde a ventilá loke e ta konsiderá komo 'violensha eksesivo' di kriminalnan di desendensia antiano, refiriendo na un IQ inferior komo kousa importante di e problema. Di su banda Aboutaleb a duna di konosé ku prensa no a sit'é korektamente. Tantu Helberg komo Labad a dun'é benefisio di duda.

 
Pero, sea ku a sit'é robes òf nò, "e mes a kuminsá ku e asuntu di IQ", asina Helberg, presidente di OCaN a agregá. "Nos a pidié pa no inkorporá e kos ei komo tal den su maneho. E problemátika rondó di hóbennan di riesgo ta sintá den vários faktor: infansia, famia, ambiente. IQ ta ún parámetro só den e totalidat. E tin ku mir'é den un perspektiva mas amplio."

 
Defensa
Su orígen marokano no ta mashá na su fabor tampoko, segun Helberg. "Si e tendensha tei pa defendé Marokano, i e hasi remarke tokante Antiano den e mes frase, tur hende ta saka su konklushon. No ta bai pa kompará, bisa e kos manera e ta, sea franko. Pa un bon respuesta nos mester di forsa uní."

 
Presidente Labad di MAAPP tambe a bisa bon kla kon el a haña e kos, pero ku el a drenta e kòmbersashon ku'n aktitut positivo sí. "E alkalde no tabatin intenshon di ofendé hende, al kontrario, e ke buska un solushon konhuntamente ku nos komunidat. Esei tabata ophetivo number ún: e kos mester resultá den koperashon pa solushoná e asuntu." Aboutaleb mes a indiká ku e ke reakshoná personalmente awé den media riba e konmoshon ku a surgi.

 
Orguyo i konfiansa
Despues di zomer alkalde Aboutaleb di Rotterdam ke sinta na mesa ku organisashonnan antiano. Tantu Labad komo Helberg ke ta enbolbí intensivamente den maneho di e munisipio. "Aboutaleb a yega di bisa ku e ke pa Antianonan ta orguyoso atrobe", asina Helberg ta kòrda. "Nos a bisa ku esei no ta su tarea. Loke sí e por hasi ta yuda nos rekuperá konfiansa den maneho munisipal. For di 2007 ta papia di un 'maneho nobo' pa emansipashon di Antiano i Arubano na Hulanda. Mi ta spera ku porfin lo aktua na lugá di papia so."