Shonnan tur,

Aña nobo ta den kurpa, asina ta ku a yega e momento pa prepará pa fin di aña, sea bo ta di paranda òf bo ta preferá kai sinta trankil i reflekshoná. Sinseramente nos ta spera ku abo, fiel oyente di nos programa i lesadó di nos wèpsait, lo disfrutá di e temporada bunita i festivo akí.

Dia promé di yanüari 2010 bo por skucha e bon deseonan i propósitonan di vários miembro di komunidat antiano i arubano na Hulanda. Pues sintonisá e programa 'Aki na Hulanda', djis klek riba djabièrnè pa bo tende e loke parlamentario Cynthia Ortega-Martijn (ChristenUnie) i Raymond Labad (MAAPP), pa menshoná algun anto, ke kompartí kubo i tambe kiko ta den tapara e aña akí. 

Nos ta deseá un i tur un tremendo temporada di fin di aña!!!

Redakshon di Aki na Hulanda

Sekshon Papiamentu di Wereldomroep

Ayaka di mama di un kolega

M’a haña yamada di un kolega di mi: ‘Ronald mi mama ta traha ayaka. Mi no sa si bo ta interesá pa kumpra’.
Mi a duda promé, pasó mi por ta masha fèrfelu banda di kuminda. I mi ta malkriá pasó prinsipalmente banda di kuminda krioyo mi tin e idea ku nan no tin e mesun bon sabor ku esun ku ta kushiná na Antia mes.
Tòg m’a disidí di aseptá e reto akí, kumprando dos ayaka serka e kolega.

Na kas yen kos tabata pasa den mi kabes. Entre otro ku e kolega a pidími pa dun’é feedback di e ayakanan ku mi a kumpra serka dje. ‘Mi ta ansioso pa sa kon b’a haña e ayakanan’.
Un tenshon aún mas pisá a baha riba mi stoma ku tabata tin un tiki miedu kaba pa e ayaka no bai kim’é.

M’a pone lechi na banda pa kualke kos. Pero ora ku mi a saka e ayaka for di awa i a kita su paña pa mi sabori’é, telefòn a rin.

Danki Dios e kòmbersashon telefóniko no a dura largu, pasó ora ku mi a sigui ku mi reto pa kome e ayaka di mama di un kolega, ahinda e dam di kayente tabata sali for di dje. 

Ku miedu pa mi stoma no kima –paso e eksperensia aki mi tabata tin ku mal ayakanan na Antia- esnan rondó di mi tabata mira mi dal e promé hapnan man’é mi tin rel dje pober ayaka.
Ora ku m’a kome mas ku mitar dje ayaka mi tabata sa e kontesta kaba pa mi kolega i su mama. 

Tremendo! Asina bon ku mi no por saka afó ta na kua munisipio di Hulanda a trah’é òf di kua bario di e islanan di Reino hulandes su orígen ta?

Anto e di dos ayaka? … Esei no ta skapa awé …

MCLMI

No lubidá ku bo tambe por kontribuí ku kualke istoria, relato, anékdota, reseta, idea, potrèt òf vidio ku tin di aber ku Aña nobo leu for di kas. Manda nan pa   bou di e título 'Aña nobo ta den kurpa!' i nos lo publiká nan pabo. Bo komentario djis bou di e column akí tambe ta bonbiní.

Skucha un kòmbersashon ameno di Leila Wijnhoven ku Ilona da Costa Gomez tokante plato i snèk krioyo ku nos Antiano i Arubanonan sa traha i saboriá tur fin di aña aki na Hulanda. Mester bisa sí ku no semper ta fásil kumpra e ingredientenan nesesario pa traha e delisianan akí. Na Rotterdam i Amsterdam ainda bai, pero pafó di e siudatnan akí aparentemente ta mashá difísil haña un bon karnisero, òf sikiera unu di konfiansa, ku ta bende mondongo limpi drechá.

Meimei Ilona da Costa Gomez ta splika en breve kon ta prepará pekelé.

Te abou bo por tende un entrevista ku algun kliente di Pico Records, e konosido diskobar na Bijlmerplein, Amsterdam Zuid-Oost. Romeo Hoost a bishitá e diskobar i a puntra kon ta pará ku kompra di disko di Pasku. Esnan entrevistá a hasi uso di e oportunidat pa manda un saludo di Pasku i Aña Nobo pa nan famia i konosí.