Pa para ketu na aña di kultura na Kòrsou, ayera iglesia New Song na Amsterdam a organisá un atardi kultural ku e título 'Lanta nos bos ban kanta'. Banda di musika, poesia, komedia i kuminda krioyo, e aña aki tabatin un programa speshal pa mucha. Nan por a siña weganan típiko di Antia i Aruba pa asina sera konosí mas mihó ku kultura di nan mayornan.

E muchanan ku a bishitá e dia di enkuentro di New Song por a siña traha fli i kapo i pòpch'i bòter ku kabei di kabuya. Tante Suzy, di Iglesia New Song tabatin e parti di kantamentu na su enkargo. E ta bisa 'nos ke duna nos muchanan nos kultura di antes. E simpel kosnan ku nos a uza antes sin Wii ku Game i kòmpüter. Nos tabata kore wil'i tayer i traha tas di paki di Tide. Mi mes ta bini di Mahuma i mi ta haña ta yamer ku aki na Hulanda nos yunan no ta hunga masha pafó i hunga e weganan di antes.

Awaseru
Manera tante Suzy a bisa, wer na Hulanda no semper ta dje bon ei. Asina tabata e kaso djadumingu tambe. Awaseru a kai asina duru ku no por a subi e flinan ku Tio Molina a siña e muchanan traha. Tin di nan nunka no a mira e ko'i hunganan aki. Manera Daniël. Pero e ta masha ansioso pa siña si kon tin ku hasié. Pa tante Carmen tabata algun aña pasa ku el a kore wil'i tayer. 'Ku un palu bo tin ku tene e wil règt riba kaminda mientras bo ta kore su tras. Mi mes no por dje bon ei, pero mi ta bai siña e muchanan sí.

Na final di e dia Tio Molina a konstatá ku satisfakshon ku e dia, aparte di e wer, a bai bon i loke ta hopi importante: e muchanan mes a goza mashá ku nan por a siña traha e ko'i hunganan di antes di nan mayornan.