Skolnan na islanan BES (Bonaire, Sint-Eustatius i Saba) e kuater añanan benidero lo haña por lo menos 6 mion dolar (4.5 mion dolar) pa rekrutá dosente. Esei minister Marja van Bijsterveldt i sekretario di estado Halbe Zijlstra, ambos enkargá ku enseñansa a disidí. Anteriormente a pone 1.3 mion dolar disponibel pa oumentá salario di dosentenan.

E sèn ta pa rekrutá maestronan for di Hulanda, pa hasi mas atraktivo pa nan bai traha na e islanan. Durante su bishita na Bonaire, Sint-Eustatius i Saba minister Van Bijsterveldt a keda konfrontá ku problemanan den enseñansa. Skolnan na e islanan tin un skarsedat kontinuo di dosente pa motibu ku no tin sufisiente dosente ta biba einan. E salario ku ta ofresé ta muchu tiki i ta p'esei no aktraktivo pa dosentenan bai biba i traha na e islanan.

Van Bijsterveldt a splika dikon el a disidí di invertí hopi sèn den enseñansa di e islanan hulandes karibeño: "Dosentenan ta hopi krusial pa garantisá kalidat di enseñansa i nesesario pa trese mehorashon. Ta p'esei ta importante pa haña un bon pago."

Punto di salida ta keda sí ku promé ta buska dosente adekuá na islanan hulandes karibense i den region di Karibe. Tambe por hasi uzo di e sèn na momentu ku skolnan ta obligá na buska dosentenan (pa tempu definí) for di Hulanda.

Por uza e sèn ku minister ta pone disponibel na momentu ku e skolnan no tin otro salida ku buska un dosente (pa un tempu definí) for di Hulanda. Por ehèmpel pa kubri gastunan di mudansa i pa kompensá penshun di behes, etc. E skolnan tin mag di uza e sèn kon ku nan mes ke pero si ta nesesario ministerio di Enseñansa i Siensia i Cultura por duna konseho.