"Dies di dies di dies! 10 di òktober 2010. Esei ta efecha ku gobièrnu tin na bista pa e momentu ku e órden estatal nobo lo drenta na vigor", asina Gobernador di Antia mr. Frits Goedgedrag a bisa djamars, 8 di sèptèmber na okashon di apertura di aña parlamentario 2009-2010, e di 59 aña ku Staten di Antia ta sinta.
 

Gobièrnu ta bisa ku e no ke inisiá un maneho nobo durante e periodo interino, a ménos ku esei ta resultá di ta 'inevitabel'i na 'interes di e siudadano'. Nos ta pará na 'bispu di un momento istóriko', segun Goedgedrag, komo ku en prinsipio ta e delaster biá ku e ta duna un splikashon di maneho di gobièrnu. Fin di sèptèmber lo palabrá e fecha definitivo pa desmatelashon di Antia hulandes durante un grupo piloto polítiko. Pero a resultá kaba ku henter e proseso di desmantelashon ta mas kompleho ku fihamentu di fecha.

E duda ta keda

Hopi hende- den i pafó di Staten- ta duda pues ku esaki lo bira e último aña ku Staten ta sinta. Mas aun awor ku lo tene elekshon nobo promé próksimo yanüari pa parlamento antiano. Dudley Lucia di PNP no ta ekskluí ku parlamento lo sinta kuater aña mas di pursí. "Kuater aña pasá durante formashon mi a remarká kaba ku no mester bisa ku esaki ta e último periodo, pero ku sí ta di deseá ku esaki lo bira e último biá. Si e islanan no ta kla, nan no por bai ainda.
 

Eunice Eisden di partido opositor MAN tambe tin su dudanan, pero e ke lucha pa Kòrsou para mas lihé posibel riba su mes pianan. "Nos ke insistí pa Kòrsou risibí su kompetenshanan mas rápido posibel. Laga nos spera ku 10 di òktober ta sigui."Tantu Eunice Eisden komo Dudley Lucia ke postulá nan mes atrobe otro aña komo kandidato pa bira miembro di Staten.
 

Den pitu di disolushon di pais Antia Staten ta kompletamente independiente i Trias Politica, e separashon di poder, ta un echo na Antia tambe awor.  Esaki ta nifiká tambe ku no ta gobernador ta nombra Atacho, pero Staten mes. Ta p'esei e presidente a habri e aña parlamentario nobo di Staten.

Independisashon di Staten
Tratamentu di e leinan di Konsenso di Rèino enkuanto kambionan estatal i adapatashon di Statüt ta bai bira e promé kasonan grandi ku Staten lo studia den e aña parlamentario nobo. "Mi intenshon ta pa kuminsá trata e leinan di Konsenso di Rèino den komishon sentral den e siman di 21 di sèptèmber i 7 di òktober. Tur miembro lo risibí oportunidat pa hasi pregunta enkuanto e konseptonan. Despues lo pasa nan pa Konseho di Minister di Rèino trata nan", asina Atacho ta bisa. Mas lat e aña akí lo ahustá Statüt.
 

Atacho ta spera,teniendo konsiderashon ku interes general, ku realisashon di pasinan Kòrsou i Sint Maarten lo ta un echo den kurso di otro aña. Ademas, Atacho ta kere ku parlamento lo bai ta hopi okupá e aña akí i ku sigur sigur lo e bira un aña parlamentario ful.