E futbolistanan hobensito di cvv-Willemstad sin eksepshon ta haña ku Vurnon Anita mester bai Kampeonato Oropeo di futbòl e zomer aki na Polonia i Ukraina. “Mi no ta dje fanatiko di dje”, Mitchell ta bisa, “pero si e partisipá e ta hasi nos pais mas famoso i esei sí mi ke!”

E deseo di e mucha hòmbernan no ta sali. Djasabra meinta bondscoach Bert van Marwijk ta divulgá e selekshon definitivo pa EK: Vurnon Anita no t’aden, e por keda kas.

Mitchell, Matthew i Dichani tur tres ta hunga den U-13 di Willemstad, e klup bieu di Anita. Willemstad a hiba mas hungadó divishon di honor, “ounke ku Vurnon ‘San Benito’ Anita ta esun di mas konosí si,”miembro di direktiva Hans de Wit ta bisa.

“Ainda tin un potrèt di dje kologá den kantina, i asta tin mucha hòmber ainda ku tempunan ayá a train i hunga kuné. Tur zomer i Pasku e ta pasa na klup ainda pa bin kumindá nos.”

Realista
Meskos ku promé ku Kampeonato Mundial 2010 na Surafrika, e futbolista ku aktualmente tin 23 aña ta kai afó na delaster momento. Tata di Anita, Vurnon senior, djis promé ku e anunsio ta mira e eskoho di bondscoach masha realista.

“Si bo ta realista, e pasenshi di e tempu ei ta paga awor. Despues di dos aña hopi bon na Ajax, ku dos kampeonato, awor ta solamente eskoho di bondscoach i no eskoho di kalidat, manera na 2010.

Seis kamber di baño
Tata Anita ta para riba promé piso di e kas nobo ku su yu ta laga traha, na Brakapoti ku bista riba Laman Karibe. “E kas ta p’e mes. Mi no sa si nos lo hasi uso di dje, ta traha so mi ta trah’é p’e.” Ku seis kamber di baño i un left den mei mei, “su wela di 84 aña tambe por bin keda drumi”, Anita senior ta atmití.

E famia no ta masha okupá ku skohementu di Vurnon. “Tur hende ta sigui’é si. Ma e kos no ta den nos man. Si e no logra e ta djis bin wak e weganan aki, i for di Kòrsou lo e lucha pa bai bèk.

Futbolista profeshonal
Pa e futbolistanan hóben di Willemstad su selekshon lo tabata bunita. “Dia mi bira grandi ami tambe ke bira futbolista profeshonal seka Ajax”, Matthew ta bisa. “E ora ei ta bunita ku Vurnon a kuminsá aki.” Pa mes ora despues e atmití ku na e momentonan aki lo el a preferá di ta Arjen Robben of Wesley Sneijder. I mester tambe, pasobra atrobe Vurnon no t’aden.