Na 2009 Carlos Calor a pèrdè su bida den un aksidente di tráfiko na Kòrsou. Su famia ta deskonsertá despues di e apsolushon ku fiskal, mr. Adeline van Waveren, a pidi siman pasá pa e shofùr di trùk E.N.M. ku tabata embolbí den e aksidente.

Fiskal no ta mira motibu pa persiguí e persona, no opstante órden di Ministerio Públiko pa ehekutá komo tal.

Carlos Calor a fayesé dia 23 di yanüari 2009 ora e tabata pasa un vehíkulo riba kaminda di Mijnbouwmaatschappij. E trùk sumamente sobrekargá di e negoshi Apache a dal e di patras. Segun polis tabata trata di un desgrasia fatal, ku por reprochá solamente e víktima; durante e aksidente lo e tabata hasi yamada riba su selular.

Investigashon di ekspertonan
E kaso a haña publisidat ora famia di Calor mes a aserká un eksperto pa investigá e sirkunstansianan bou di kua e desgrasia a tuma lugá. For di e investigashon a bin sali afó ku e deklarashon di e sospechoso i di un testigu no tabata kuadra ku resultadonan di e investigashon tékniko.

Asina bin sali na kla ku e trùk di E.N.M. tabatin un karga di 9.000 kilo di mas i ku e no a logra para e vehíkulo ora Calor a blo riba dje i a trata na pas’é. Tur dos vehíkulo tabata kore riba e mésun banda di kaminda, siendo ku E.N.M. tabata gana velosidat riba Calor te finalmente push’é den roi na man robes. Ademas a resultá for di e rekòrtnan di e provedor di selular ku Calor no a hasi yamada na momentu di e desgrasia, manera sospechoso i testigu a deklará.

E famia no a konfia e asuntu despues ku polis i Ministerio Públiko a deklará mei ora despues di e aksidente ku e trùk di e sospechoso tabata ‘téknikmente den bon kondishon’. Investigashon di eksperto a revelá ku a modifiká e outo pa por transportá un karga muchu mas pisá. Sinembargo nunka no a kùr e vehíkulo pa esaki, ni tampoko no a ahustá e breknan.

Persekushon ordená
Ku e investigashon den man Korte a hala atenshon di Ministerio Públiko i a ordená persekushon di tur manera. Pa sorpresa di e famia, Ministerio Públiko a mantené e deklarashon di sospechoso i testigu durante e seshon di siman pasá. Durante e seshon MP no a hasi kaso di e detayenan spesífiko di e investigashon di eksperto, ku  ta revelá kosnan kompletamente otro di e desgrasia.

Tambe a sali na kla durante e seshon ku fiskal Van Waveren a lubidá di añadí e datonan di telefòn di Carlos den e dosié.

Durante e seshon e sospechoso a atmití ku e ta sobrekargá su trùk sistemátikamente riba instrukshon di su doño di trabou. El a bisa tambe ku e tabata na altura ku e no por a para su trùk ku e velosidat ku e tabata kore.

Wes a puntra su mes abiertamente kon bini e brùg balansa di Mijnmaatschappij no tin funshon den kuadro di seguridat di tráfiko. A kaba di pisa tantu e vehíkulo di Calor komo esun di E.N.M. ku e resultado ku no por a permití e  dos outonan riba karetera.

Bòm riba wil
Den un reakshon famia Calor ta bisa ku nan no ta provokando un kondena di E.N.M. “Un shofùr tin su responsabilidat, pero mas importante ainda ta ku ta yega un paro na e situashon di sobrekarga sistemátiko”, segun Charisse Calor, ruman muhé di Carlos.

“Diariamente tin trùk ta kore drenta Willemstad manera bòm riba wil, ku sobrekarganan pisá riba órden di doñonan di trabou i ku saber previo di e shofùrnan; ta esei ta loke ta preokupá mi.”

Veredikto ta dia 29 di yüni.