“E desishon ku gabinete Schotte a tuma aña pasá pa baha tarifa di koriente ku 5 sèn a sòru pa un buraku di mas ku 30 mion florin riba presupuesto di Aqualectra”. E kousa prinsipal ta ku gobièrnu no a sigui e konseho di ‘Bureau Telecommunicatie, Post en Utiliteiten’ (BTP&U) den su totalidat. Esaki di akuerdo ku eks-polítiko Gregory Damoen.

Damoen ta referí na un rapòrt di BTP&U den kua klaramente tin pará ku e redukshon di 5 sèn mester a bai kompañá ku adaptashon di preis di kombustibel pa Curoil segun fluktuashon riba merkado internashonal. Pero esaki no a sosodé. Durante un aña largu gobièrnu no a adaptá tarifa mientras ku riba merkado internashonal sí tabatin oumentunan drástiko. “Ku esaki Schotte a empeorá e situashon di Aqualectra”.

'Assessment'
Damoen ta atmití ku e situashon di Aqualectra nunka tabata alentador i ta pesei e no ta komprondé ta kon bin e gobièrnu aki no a hasi nada for di un prinsipio. “Ami a verwagt ku na momentu ku e gobièrnu aki a sinta, lo a laga hasi un ‘assessment’ den kompanianan di gobièrnu pa wak kiko tin i kiko no tin, anto pa wak kiko mester hasi pa drecha e situashon”.

Privatisashon di Aqualectra
E gobièrnu aktual a bisa di ke liberalisá e merkado energétiko. Promé Minister Schotte a papia di ‘ontbundeling’ di Aqualectra. Ku otro palabra gobièrnu ke bai privatisá e parti di produkshon di koriente di Aqualectra. Pero no ta trata aki di un privatisashon komun i koriente. Segun Gregory Damoen, aki privatisashon ke men habri merkado kaminda gobièrnu pa medio di bendementu di konseshon ta laga sektor privá produsí koriente a base di un asina yamá ‘productiemix’.

"Te ainda pami ta masha straño ku ni Departamentu di Finansa, ni Banko Sentral, ni tampoko Departamentu di Asuntunan Ekonómiko no a wòrdu aserká pa un konseho riba e memorando di entendimentu (MOU) ku a firma resientemente tokante liberalisashon di merkado".

‘Productiemix’ no ta garantía

Henter e maneho bèrdè di gobièrnu pa ku Aqualectra ta konsistí di produkshon di awa ku koriente a base di un kombinashon entre diferente fuente di energía manera petroli, bientu, solo i gas natural. Segun Promé Minister Schotte introdukshon di e 'productiemix' aki lo sòru pa un redukshon di tarifa. Gregory Damoen tin su dudanan al respekto ya ku te awe gobièrnu no por a presentá un estudio ku ta demostrá esaki.

Fiansa di 300 mion ta legal
Gregory Damoen ta kontradesí e ponensia di gabinete Schotte ku ta bisa ku e fiansa di 300 mion ku Aqualectra a hasi serka Banko Sentral ta illegal. “E fiansa ta kompletamente legal i ta kumpli ku tur e rekisitonan”. Loke ta pasa ta ku e gobièrnu aktual tin problema ku gerensia di Banko Sentral i ta buska den esaki un motibu pa kore ku e direktor meskos ku a kore ku eks-direktor di Aqualectra.

Segun Damoen ta ku e fiansa aki a logra di refinansiá e gastu di interes di 16.75% ku tabata paga na e eks-akshonistanan Mirand i Mitsubishi i ku awor a bira 5%. Ku otro palabra dor di e fiansa aki e struktura finansiero di Aqualectra a bira mas saludabel di loke e tabata promé. Anto ta esaki ta e loke e gobièrnu aktual a heredá.

Saka regulashon for di BTP&U
“Un di e promé kosnan ku mester hasi ta saka regulashon di energia for di BTP&U i lanta un reguladó separá ku ta independiente”. Damoen ta di opinion ku BTP&U no ta disponé di e konosementu spesialisá di energia i por lo tantu no por papia ku outoridat riba e materia aki. Ta bin aserka ku BTP&U ta hasi análisis sin konsultá ku ekspertonan di Aqualectra òf otro ekspertonan den e sektor di energía.