Den kuadro di elekshonnan benidero tur siman nos ta trese un reportahe den kual nos ta papia ku tur partido ku ta den e kontienda elektoral riba un tema spesífiko. E tópiko di e siman aki ta hospital nobo.

Te ku aworaki e partidonan ku a konfirmá nan partisipashon ne proksimo elekshonnan ta MFK, MAN, PS, PAR, PNP, FOL, PAIS, DP, PL, i PAN. Tur e dies partidonan aki ta di opinion ku no por pone e instrukshon di Hulanda un banda i bai fía sèn riba merkado finansiero pa konstrui un hospital nobo. E motivashonnan sinembargo ta diferenshá for di otro.

Instrukshon di Hulanda
Charles Cooper di MAN ta bisa ku e instrukshon di Hulanda no ta forma un opstákulo pa fía sèn riba merkado pa motibu ku ta e ‘rentelastnorm' di 5% ta esun ku ta rigi e fiamentu di sèn i no e instrukshon. Segun Cooper e instrukshon tin di haber unikamente ku e presupuesto.

Helmin Wiels di PS ta konsiderá e plan di hospital nobo komo un asuntu koriente i no un kompromiso finansiero nobo i komo tal e no ta kai bou di e restrikshonnan di e instrukshon. Wiels ta proponé un fórmula di ‘lease-koopcontract’ kaminda esun ku ta konstrui e hospital mes ta bai finansiá esaki.

Humphrey Davelaar di PNP ta di opinion ku gobièrnu no mester fía plaka ni para garantia i ta proponé pa laga sektor privá finansiá e hospital nobo a base di su rentabilidat. Davelaar ta referi aki ne plan original di Fundashon Hospital Nobo bou di guia di Profèser Dòkter Bob Pinedo.

Tereno di Amstel
E aktual partidonan di oposishon PAR, PNP i FOL i tambe PAIS no ta haña e tereno di Amstel adekuá pa traha un hospital nobo. Emily de Jongh-Elhage di PAR ta mira e eskoho di Amstel mas bien komo un kapricho di e aktual gobièrnu. Segun de Jongh-Elhage por traha e hospital nobo na Otrobanda mes òf por laga drecha esun eksistente.

Ballast Nedam
Apesar di ta forma parti di koalishon Pueblo Soberano ta di opinion ku mester posponé konstrukshon di e hospital nobo i revisá partisipashon di e kompania Ballast Nedam. Segun Helmin Wiels e kompania aki ta hopi dudoso i tin un reputashon internashonal di froude i soborno. Tantu Wiels komo Anthony Godett di FOL tin hopi duda den Ballast Nedam mirando e mal eksperiensha den pasado ku konstrukshon di Banko Sentral kaminda a presupuestá 45 mion florin i na final e konstrukshon a bin sali 85 mion florin lagando hopi debe atras.