‘Basá riba e resultado di e pre-elekshon kaminda PAIS a haña sosten di 4195 voto mi ta kere ku e partido lo saka un asiento sigur i kisas dos, pero PAR ta hopi duru pariba aki’, esaki ta e opinion general di habitantenan di Santa Rosa.

Esaki ta e di dos elekshon den kua PAIS ta partisipá. Durante e último elekshon PAIS a obtené un total di 2202 voto for di kua 115 voto a bini di e urnanan elektoral number 95 i 96 na Santa Rosa.

Mester komuniká mas
Na Café Santa Rosa ku ta propiedat di Alex Rosaria, lider di PAIS, nos a puntra algun habitante di e bario nan opinion riba PAIS. Tantu Roy, Lucio komo Hareman ta di opinion ku Alex Rosaria mester move un tiki mas den e bario. “Alex ta hopi dinámiko i ta hasi bon uso di su establesimentu pa promové su partido pero esaki no ta sufisiente, e mester traha riba e parti di komunikashon ku habitantenan di bario pa e por haña mas sosten . Tambe e mester pone mas propaganda riba kaya pa por konvensé e votadónan”.

Stephany, un hoben ku ta koriendo stazje na Naschoolse Opvang, i ku ta bai vota pa di dos biaha a bisa ku e no konosé e partido di Alex Rosaria.
 
No ta un alternativa
Dos shen meter mas leu na Toko Cadushi nos a papia ku mas habitante di Sta. Rosa. Pa Fedjai e echo ku PAIS a logra haña sosten di 4195 votadó no ta bisé masha kos, e ta kere si ku PAIS lo saka un asiento. Tantu Fedjai komo Gachi no ta mira PAIS komo un alternativa. “E partido no tin hende nobo na kabes, ta e mesun hendenan di e partidonan tradishonal. Pa un partido por ta un alternativa real e mester di hendenan nobo ku nunka antes tabata den politika”.

No tin sufisiente atenshon
Segun Jeanette Martina i Siraima de Caster , Sentro di Bario Sta. Rosa no ta haña sufisiente atenshon serka gobernantenan. E bario mester di un kancha deportivo, un opvang pa despues di skol i aktividatnan pa hende grandi. “Nos tin hopi proyekto pero nos mannan ta mará pa falta di sufisiente plaka. E supsidio di gobièrnu ta yega apenas pa paga awa, lus, telefon i salarionan”. Tambe pastor Carlos di Parokia di Sta. Rosa ta sinti falta di espasionan deportivo pa por kita e hobennan for di riba kaya. ”Despues di 5’ór di atardi no tin fasilidatnan habrí pa e hobennan di bario”.