A deskubrí agave weevil, un insekto ku ta kome tur mata di agave djaden, na Fòntein tambe. Segun biólogo Gerard van Buurt entretantu e bestia a plama riba henter parti sùit di Kòrsou i no por para e infestashon di e insekto aki mas, ni e mortalidat enorme bou di matanan di agave.

Ayera a bira konosí ku a haña e insekto peligroso na Coral Estate. A pidi habitantenan di e área pa spùit e raisnan i blachinan di agave den nan kurá mes ora ku un insektisida sistémiko pa asina si tin larva nan muri mes ora.

“Pero lastimamente nos tabata lat kaba”. Van Buurt ta bisa. Mi a kaba di haña notifikashon di San Nicolas i Santa Martha. Agave weevil a plama riba nos isla i no por hasi nada mas kontra dje.

Insekto agresivo
Agave weevil ta un asina yamá ‘espesie invasivo’, un espesie ku no ta di Kòrsou originalmente i ku a establesé pafó di su ambiente natural. E insekto chikitu pretu ta bora buraku den un mata i pone webu aden. Ora e larvanan nase nan ta kome e mata pa nan haña sali pafó. Den algun luna esaki lo kousa un mortalidat enorme bou di agave na Kòrsou.

Kòntròl èkstra na e otro islanan
Segun Van Buurt ta importante pa awor pèrkurá pa e insekto no resultá na Aruba i Boneiru. “Mi a pone mi koleganan einan na altura di loke nos a haña na Kòrsou. Mester kontrolá tur mata di agave i yuka ku importá na e islanan.”

Mata multifunshonal
Agave ta un fuente di nutrishon importante pa raton djanochi i tambe blenchi i otro para ta dependé di e mata aki pa nan líkido. Ademas na Kòrsou na gran eskala ta kultivá e agave Aloë Vera òf sentebibu, un agave ku tin benefisio pa salú, komo ingrediente pa crema kosmetiko, djèl, shampo i bibida.