Di un idea pa skibi un obra riba hende muhé di diferente grupo étniko tokante fieldat i amor a ripará ku hende hòmber kasi nunka no ta wòrdu skucha riba nan pensamentu i sentimentunan. Ta asina a yega na e monólogo ‘Trouw & Liefde’ mirá kompletamente for di punto di bista di hende hòmber di diferente nashonalidat.

Den e edishon di Bon Informá di e siman aki nos ta papia ku Gita Hasham eskritora di e obra, aktor Edward Reineta i Marloes van Rooijen di Teater Luna Blou tokante di e obra aki. Den e monólogo aki hopi situashon ku ainda ta tabú na Kòrsou ta bini fuertemente dilanti. Algun di nan ta homoseksualidat, infieldat, incest i machismo.

Kibra barera di tabú
Edward Reineta: “Esaki ta un obra kaminda for di kuminsamentu te na final tur hende hòmber por identifiká nan mes ku kada aspekto ku bini dilanti i por rekonosé nan mes bèk den dje”. Segun Reineta esaki ta un bon chèns pa kibra e barera di tabú i trese un mensahe pa e públiko.

E monólogo ta keda interpretá pa e aktornan lokal Edion Booy, Jeroen Heuvel, Eduard Reineta, Albert Schoobaar i e kantante Junior Tecla. Ta trata aki di un monólogo kaminda e aktornan ta interpretá e papel di sinku hende hòmber di diferente nashonalidat ku ta konta otro di nan eksperienshanan amoroso.

Sentimentu ta meskos
Un di e mensahenan ku e obra aki ke duna ta ku apesar ku hende hòmber di diferente nashonalidat tin kulturanan diferente tòg bo ta mira ku nan tin hopi kos en komun pa loke ta ekspreshon di nan sentimentunan. “No ta importá ku si ta hende hòmber blanku, pretu òf di otro rasa, e parti di sentimentu ta meskos”.