Feyenoord ke bira konosí. “Ultimo siman un tim di Feyenoord Soccer School a baha riba Kòrsou pa promové un kampo di di futbòl di sinku dia na aprel. Curtis Martels ta direktor di e skol i ta splika ken ku ke tende, ku e ‘marka’ Feyenoord ta mas ku futbòl so.

Martels, èks futbolista di ADO i RBC, a kaba di tene su promé konferensha di prensa na Kòrsou. Huntu ku èks internashonal di futbòl Ben Wijnstekers i direktor di Curaçao Soccer School, Ronald Añes, 150 mucha hòmber i mucha muhé entre 7 i 17 aña pronto lo por train ku e èks hungadónan di Feyenoord, Pim Doesburg i Ulrich van Gobbel.

Eksperiensha di marka
Segun Martels Feyenoord no ta en buska di talento nobo chikí, esta no na promé lugá. ‘Eksperiensha di marka’ ta e palabra mágiko den e business model di e klup di Rotterdam-Zuid. Feyenoord Soccer Schools ta un ‘produkto’ ku ta bini seka e fanátiko. “No ta tur hende tin okashon pa bini Rotterdam i train huntu ku nos, ta p’esei nos ta bai seka e fanátikonan”, segun Martels.

Ta promé be ku e skol ta sali for di Hulanda. Martels ta haña e eskoho pa Kòrsou un bunita paso: “Feyenoord naturalmente ta konosí kaba na Kòrsou. Aki ta papia hulandes i, importante, sponser riba e isla i kontaktonan personal den futbòl di Kòrsou a hasi na mihó esfuerso pa manda buska nos.”

Asina e kampo di futbòl na aprel ta un tèst pa Feyenoord Soccer School tambe. “Si e kos kai na agrado, nos por wak ku e tipo di proyekto aki ta posibel na otro isla manera Aruba i Boneiru tambe”, Martels ta bisa.

Komunidat
E èks futbolista ta enfatisá ku Feyenoord tin un responsabilidat pa komunidat tambe. “E marka Feyenoord tin un gran radiashon, alkanse i atrakshon. Bo mester usa esaki pa sirbi komo ehèmpel pa hubentut riba kaya.”

Training ta un kombinashon di futbòl i enseñansa. Ta masha importante pa desaroyá un noshon di norma seka e hobennan. “Orguyo, rèspèt, disiplina, koperashon i alegria ta nos lema den esaki”, segun Martels. “Ademas bo por siña aritmétika, idioma i geografia tambe, si bo tuma futbòl komo punto di salida.”

Sobreviví
Martels ta rekonosé ku e lucha pa sobreviví di e klup finansieramente bashí ta un motivashon grandi. “Nos tur sa ku nos a pasa den un temporada finansiero pisá. Ta p’esei Feyenoord ta buska merkado nobo.” Pa Martels di desendensha surinameño ta lógiko pa skohe Kòrsou pa motibu di e laso históriko ku Hulanda.

E echo ku klupnan manera NEC i Ajax a bai dilanti di Feyenoord no ta molestié. “Nos skol a gana Rinus Michels-award pa training di hubentut di aña dos be kaba. E último enkuentro entre Ajax i Feyenoord (4-2, red.) ta un bon ehèmpel di realidat. Ku un tiki arogansha: bo no ta gana fasil di un marka asina fuerte”, Martels ta bisa.

Sekreto
E sekreto di Feyenoord Soccer School segun Martels ta ku a wak bon seka espesialmente klup ingles. E lema ‘Train manera Feyenoord’ parse a tum’é direktamente di e lema di Arsenal: “Play The Arsenal Way”.

‘Ma nos ta bai un paso mas leu’, Martels ta bisa. “Nos ke ta den desaroyo di mucha. Feyenoord ta mas ku futbòl so. Feyenoord ta un eksperiensha i esaki nos mester por realisá na Kòrsou.”