Ni maske mayoria di pueblo pidi pa un referèndem gobièrnu di Boneiru lo no honra esaki i pueblo lo mester warda te na e próksimo elekshonnan na 2015. “Asuntu di referèndem ta tras di lomba i bo tin ku duna Boneiru chèns pa bai atendé e problemanan ku tin den komunidat”.

Asina diputado Burney Elhage a duna di konosé den e edishon di Bon Informá di e siman aki den kual nos a papia tambe ku Norwin ‘nòchi’ Willem di Fundashon Bon Gobernashon i historiadó Arthur Sealey.

Segun Elhage awor ta tempu pa Boneiru komo parti integral di Hulanda desaroyá su mes hasiendo uso di e posibilidatnan ku Hulanda ta ofresé.

Pafó di Konseho Insular
Nòchi Willem di su banda a bisa ku sea gobièrnu ke òf no, e referèndem lo bini tòg i ya kaba e diferente gruponan di preshon ta den kontakto ku Nashonnan Uni pa organisá un referèndem pafó di Konseho Insular. “No ta obligatorio den ningun lei ku ta Konseho Insular só por organisá un referèndem. Nos tambe por organisá un referèndem popular bou di supervishon di Nashonnan Uni. E derecho di outo-determinashon ta un derecho eksklusivo di un pueblo i no di politikonan”.

Protesta
Riba dia di Boneiru diferente grupo di protesta a uni den un manifestashon i a organisá un marcha di protesta pero tòg ta un parti chikitu di pueblo so tabatin kurashi di ekspresá nan malkontentu abiertamente. Segun Nòchi Willem esaki tin di haber ku e tradishon di e pueblo boneriano ku hopi biaha ta murmurá na snèk òf bou di palu, pero ora ku mester mustra nan kara bo no ta haña nan asina fuerte.

Segun un enkuesta ku Wereldomroep a laga hasi, kuater di kada dies boneriano lo bai vota pa elekshonnan di Tweede Kamer di kual ochenta porshentu no sa ainda pa ken nan lo vota. Diputado Elhage no ta mira problema den esaki i ta haña e resultado aki masha normal mirando ku no tin ni dos aña ainda ku Boneiru a bira parti di Hulanda.