Elekshon pa Parlamentu di Kòrsou 19 di oktober 2012

Den kuadro di elekshonnan benidero tur partido partisipante ta duna kada siman nan opinion riba un tema spesífiko. E biaha aki: Finansas

Ku eksepshon di e partidonan di koalishon, tur otro partido ta haña ku e ròl di Cft ta unu util pa nos pais i komo tal no mester eliminá Cft sin mas. Sí ta asina ku kada partido tin su propio pensamentu pa ku kontinuashon di Cft.

PAIS por ehèmpel ta di opinion ku Cft mester keda te ora nos ta sufisiente madurá i por pone nos finansas públiko na òrdu. “Asina nos madurá nos mester tuma tur e normanan over di Cft i hinka nan den nos propio leinnan”. FOL di su banda ta mira Cft komo algu temporal i ta boga pa bini ku un asina yamá ‘begrotingskamer’ kaminda nos mes ta atendé nos asuntunan. MAN i Pueblo Soberano tambe ta na fabor pa bini ku un ‘begrotingskamer’ i sali for di Cft mas pronto posibel. “Si bini ku un ‘begrotingskamer’ Cft ta bira obsoleto”.

Défisit
E partidonan di gobèrnu MFK, PS i MAN ta di opinion ku Kòrsou tin sufisiente rekurso pa kubri e défisit riba presupuesto i ta akusá Cft di ta stroba gobièrnu den esaki. Pa MAN ta inkomprendibel kon Cft ta ninga Kòrsou pa usa parti di su reservanan i sènnan di BRK (Betalingsregeling van het Koninkrijk) pa kubri su défisit. Helmin Wiels di PS ta mira Cft komo un instrumento politiko di Den Haag. “Hulanda ta pèrmití St. Maarten i Aruba fia plaka pa paga debe bieu anto na Kòrsou si ke skruf nos pueblo”.

PAR i e kombinashon  DP/PL ta mira solushon di nos défisit den un dialógo tripartit ku e sektornan empresarial i sindikal pa yega na un plan pa restrukturá nos finansas. Na opinion di FOL no tin espasio pa tuma mas medida i mester buska otro solushon. PAIS di su banda ta haña ku mester restablesé konfiansa bèk den nos ekonomia ku na su turno mester sòru pa kresementu ekonómiko. “No ta gobièrnu só mester saka sèn, tin hopi sèn den sektor privá ku no ta keda inverti pa falta di konfiansa”.

Impuesto
Práktikamente tur partido ta di opinion ku no mester subi impuesto i ta boga pa mas tantu posibel bai over na impuesto indirekto i menos impuesto direkto. Segun PAIS mester wak sí pa esaki bai di tal forma ku tur hende ta benifisiá for di dje i no un grupito so. Tambe mester hasi e kobransa di impuesto muchu mas efektivo i efisiente di manera ku tur hende ta paga impuesto.