“Dia di Obrero ta un dia pa pensa riba balor di labor i di obrero na Kòrsou.” Palabranan di èks lider di sindikato Errol Cova. Èks lider di sindikato Hubert ‘Bebe’ Rojer ta reflehá riba e dia aki i ta apelá na un i tur pa forma ‘union den solidaridat’.

Awe nos Parada ta dediká na Dia di Obrero i kiko esaki ke men pa e trahadó. Errol Cova ta penshoná, pero 30 aña largu e tabata presidente di bònt di enseñansa Sitek. Tambe e tabata na kabes di Kamara di Sindikato di Kòrsou. For di aña pasa Cova ta representá empleadonan temporario ku no tin siguridat di derecho i trabou.

Hubert ‘Bebe’Rojer último tempu ta aktivo atrobe i ta yuda SitCom, e bònt di trahadó di kompania di telekomunikashon UTS.

Sueldo mínimo
“Ta deplorabel ku mas ku diesmil obrero na Kòrsou ku ta traha pa un agensia di empleo ta traha den insiguridat”, Errol Cova ta bisa. “Nan no tin niun siguridat, mas ku mitar di nan ta gana sueldo mínimo òf ménos. No tin sufisiente rekonosementu pa balor di labor i di obrero.”

Rojer tambe ta boga pa trata violashon di derecho di obrero. Den pasado e tabata presidente di bònt di amtenar Abvo diesun aña. E ta konvensé ku unimentu di forsa ta yuda. Rojer: “Nos mester bai di akuerdo ku otro i koperá pa bienestar di tur trahadó na Kòrsou.

Reportero Belkis Osepa a sali riba kaya pa papia ku obrero. E pregunta mas importante: “Kiko Dia di Obrero ke men pa bo?”