Un órgano atministrativo independiente mester bai skrutiñá kon e aktual situashon na WEB i Ecopower por a sali di tal manera for di man. Esei ta loke Gezaghebber Lydia Emerencia di Boneiru a disidí. Reunion di konseho insular di 21 di ougùstùs a kaba ku entrega di tres moshon dor di oposishon. Pero dor di e proporshon di votamentu di kuater kontra kuater, e moshonnan no por keda ehekutá.

Apesar di e preokupashon di e oumento drástiko di tarifanan di elektrisidat ku tur tabata teme p’e, poko bonereiano a bai protestá na e reunion di konseho insular. Poblashon tin aparentemente poko nesesidat pa sali bai kaya.

Stùnt polítiko
James Finies sí a bini reunion. E ta kere ku ya tin un solushon pa e konflikto entre e empresa di gobièrnu WEB i produktor di koriente Ecopower. Hulanda na bispu di elekshon pa Tweede Kamer lo ke yuda Boneiru, asina Finies ta pensa. “Ta un stùnt polítiko. Hulande ke bin hunga héroe i ke skor.”

Na kuminsamentu di reunion públiko di konseho insular, e aktivista ingles di medio ambiente i periodista Sean Paton, ku ya tin diesun aña bibá na Boneiru, a haña dies minüt di tempu pa papia i splika un solushon ku e mes a pensa pa e oumentu di tarifanan di elektrisidat. Segun Paton e empresa di utilidat mester keda deklará fayit. “E akshonnan mester bai e ora ei pa un kooperativa di poblashon i e empleadonan di e empresa nobo di utilidat. E kontrato di Ecopower e ora ei no ta bálido mas.”

Kontrato ta fiho
Dor di e solushon di Paton, gobièrnu e ora ei lo por bai negoshá un akuerdo di nobo ku Ecopower. Direktor interino di WEB Ger Vogelesang no ta mira nada den e proposishon ei. Segun e, e kontrato ku e kompania di produkshon Ecopower ta fiho. “WEB den e próksimo 13 añanan lo mester paga e preis manera e ta, manera e komishon di arbitrahe a determiná. No tin kaminda pa bai bèk. E konsekuensianan ta ku klientenan mester bai paga mas pa energia.”

E no por indiká ki dia e tarifanan mas haltu lo drenta na vigor. “Kuerpo Gubernamental ta disidí esei. Loke mi por hasi solamente ta bini ku proposishon. Mester solushoná e problema lihé, pasobra entrante 15 di sèptèmber nos ta haña resibunan nobo di Ecopower, ku mester keda pagá.”

Den e tres moshonnan ku oposishon a entregá a puntra entre otro pa bini ku un komishon di eksperto ku lo mester desaroyá un plan pa uni produkshon i distribushon den ún empresa. Hulanda lo mester sòru pa un apoyo i sosten tékniko i finansiero.