Radio Nederland Wereldomroep a organisá den koperashon ku TeleCuraçao i Radio Hoyer dos debate ku hóbennan yu di Kòrsou ku e pregunta sentral: ‘Kon multikultural komunidat kurasoleño ta?’ E debatenan akí ta den kuadro dje kambionan estatal den Reino. Dia 10 di òktober 2010 Kòrsou lo mester bira pais outónomo den Reino.

E lasonan entre e dos partinan den Reino lo mester bira formalmente mas estrecho, ora Kòrsou bira un pais outónomo den Reino. Pero tòg ta parse ku e toleransha di yunan di Kòrsou pa ku Hulandesnan na e isla ta birando ménos.
 

E promé debate a tuma lugá na Hulanda ku hóbennan yu di Kòrsou ku ta studia na Hulanda. E debate akí a hiba komo lema: ‘Nos tin lei ku otro?’. Un dje konklushonnan dje debate akí tabata ku si Hulandes i Kurasoleñonan ke tin lei ku otro, nan mester respetá otro i mustra interes den otro. E hóbennan a diskutí riba tópikonan manera entre otro istoria di Kòrsou den relashon ku Hulanda i kambio di mentalidat.
 

Lo transmití e di dos debate live na TeleCuraçao djaluna 7 di desèmber. Aki ta sigui un impreshon dje promé debate ku a tuma lugá na Hulanda. Despues di dia 7 di desèmber por mira tambe e debate ku a tuma lugá na Kòrsou aki riba nos wèpsait www.akinahulanda.nl òf www.caribiana.nl