Hustisia i polis na Hulanda i na Antia ulandes a detené seis persona en konekshon ku involukrashon den trafikashon di kokaína na gran eskala riba nivel internashonal. E sospechado prinsipal ta un Hulandes di 39 aña. A arest'é na Boneiru. Bosero di Parkèt nashonal di Ministerio Públiko a notifiká esaki djamars, 8 di sèptèmber.
 

Ya ta kasi un aña ku e kaso akí ta den investigashon i e ta ekstendé di Suramérika te na Wèstafrika i Oropa. Hustisia ta bisa ku presuntamente e sospechado tabata na kaminda pa Suramérika pa deliberá riba un transporte grandi di kokaína ku finalmente mester a yega Hulanda. Ministerio Públiko ta sospechá ku e hòmber a laba por lo ménos algun shenmil di euro na plaka di droga.
 

Ademas di trafikashon di koka i labamentu di plaka ta sospechá e seksteto di ta involukrá den kontrabanda di oro via Antia hulandes i Aruba, segun Ministerio Públiko. E investigashon ta koïnsidí parsialmente ku un indagashon amplio na Antia i Aruba di froude i práktikanan di labamentu di plaka.
 

Entrada hudisial na kas di Ramoncito Booi

Djamars anochi reshèrshi a hasi entrada hudisial masivo na kas di Ramoncito Booi, lider di partido di oposishon UPB di Boneiru, esaki den kuadro di e investigashon.

Ministerio Públiko di Antia hulandes ku sede na Kòrsou ta kordiná e kaso. No a duna informashon detayá ainda, pero MP ta papia sí di 'sospecha di echonan kastigabel relatá na froude, ku hendenan den seno di gobièrnu na Boneiru a kometé.'

MP a detektá e kos akí durante un investigashon masivo di práktikanan di labamentu na Antia i na Oropa, vinkulá ku narkotráfiko internashonal. Na Boneiru lo a listra dos bibienda mas. Ministerio Públiko no a konfirmá esaki ainda. Na Aruba i Kòrsou tambe a hasi entrada hudisial na kas di hende, asina fiskal di prensa Ludimila Vicento a partisipá. No ta ekskluí mas aresto i listramentu di bibienda.
 

Lider polítiko Jopie Abraham no ta asombrá ku e detenshonnan. "Tabatin asina tantu indikashon di vários kaso ku no a bai di un forma korekto na e isla. A sali entre otro un buki pretu ku ta prueba kontundente di un situashon spesífiko di abuzu. Mi a fèrwagt e kos akí fe mashá ten." Abraham ta haña ta lástima ku atrobe ta papia malu di Boneiru.
 
Skucha kòmbersashon di koresponsal René Roodheuvel ku lider polítiko Jopie Abraham i fiskal di prensa Ludimila Vicento