SP ke deshasí di tratado di FOL ku tin entre Reino i Merka. A base di e tratado akí, a krea fasilidat pa avionnan militar merikano na Aruba i Kòrsou. Ta uza e avionnan pa kombatí droga, pero segun presidente Chávez di Benesuela, sa sosodé regularmente ku nan ta violá espasio aéreo di su pais i lo ta uza FOL pa prepará un akshon militar na e pais bisiña.

Den un karta pa parlamento hulandes Minister Maxime Verhagen di Asuntunan Eksterior a bolbe ripití ku loke Chavez ta bisa no ta bèrdat. Tambe el a enfatisá ku e no ta laga niun tenshon kresiente lastr'é bai kuné. E ta haña un bon relashon ku e pais bisiña mas grandi di Reino masha importante.

Forward Operations Locations (FOL) no ta base militar, mané Benesuela ta blo pretendé, asina Verhagen ta deklará. Ta trata di fasilidatnan limitá, for di kual avionnan no armá ta kombatí aktividat ilegal relashoná ku droga. Verhagen ta primintí transparensha máksimo den kaso di FOL.

Seramentu di FOL
Durante un reunion tokante maneho di Minister Verhagen pa Latino Amérika i Karibe ku ta tuma lugá djaweps 4 di febrüari, parlamentario Harry van Bommel di SP (Partido Sosialista) lo proponé pa pone un fin na e tratado ku Merka. Ambos gobièrno ke prolongá e tratado akí silensiosamente pa sinku aña, pero segun Van Bommel esaki no ta prudente. 'Si bo prolong'é mes ta mihó bo hasié kada biaha ku un aña'.

Van Bommel ta bisa ku den transkurso di tempu meta di FOL a para kambia. E lucha kontra droga a brua ku esun kontra rebeldenan. Di e forma akí nos ta keda envolví den un konflikto ku Hulanda no tin arte ni parte aden.'

Opinion di Aruba i Antia
Parlamentario van Bommel ta puntra su mes tambe ta ki benefisio e islanan tabatin di e lucha kontra droga durante e delaster dies añanan. Awor ku Benesuela tin mas i mas opheshon kontra presensia merikano na Aruba i Kòrsou, ya ku nan lo ta sirbi komo base pa yega e pais, ta mihó pa pone un fin na e tratado. Na momento di evaluá e tratado, van Bommel ke tene kuenta tambe ku opinion di Antia i Aruba.

Por sierto e parlamentario no ta kere ku di bèrdè lo ta preparando un invashon militar na Benesuela. 'Pero e ta okashoná mashá tenshon. Esei no ta deseabel i e no ta na interes di Hulanda. Van Bommel ta spera ku partido polítiko GroenLinks lo sosten'é i ta spera ku lo por hiba un debate pisá.