E logro di Komishon De Wit por tabata muchu mas grandi. Den De Volkskrant por lesa un análisis di trabou di e komishon, ku ta investigá kousa di krísis di krédito na Hulanda. E komishon a skucha un total di 42 persona di gremio finansiero. De Volkskrant ta kere ku ta komishon De Wit só ta kontentu ku e manera k'e kòmbersashonnan a bai. Den e análisis ku a sali awé den e korant tin pará ku e komishon por a saka ekspreshonnan mas skèrpi for di boka di e invitadonan di mundu finansiero, pero ku no a hasié.

Hopi biá ta sosodé ku wesnan no ta komprondé resultado di rapòrt di investigashon, asina Algemeen Dagblad ta informá. Wesnan ta kere ku nan ta interpretá e konklushonnan korektamente, siendo ku en realidat nan no ta komprondé kiko esnan ku a skibi  e rapòrt kemen. Esaki ta resultado di un investigashon kaminda wesnan mester a lesa rapòrtnan fiktisio i interpretá nan. Sentro di estudio NSCR, ku a tene e investigashon, ta kalifiká e resultado komo 'alarmante'.

Tur mucha di un skol básiko na Deventer lo risibí un lèptòp ku nan mes nòmber riba dje. De Volkskrant ta informá ku na ta risibí e kòmpiuter portátil pa por superá e retraso riba terenu di idioma. Ku e netbook e muchanan por hasi ehersisio, skibi artíkulo òf pasa èksamen. Tur esaki riba nan propio nivel di siñansa. Nobenta porshento di e alumnonan dje skol na Deventer ta alóktono, o sea di desendensha strañero. Nan mayornan tambe ta bonbiní n'e skol ora primavera kuminsá. Nan por haña lès di idioma, tambe ku yudansa di lèptòp naturalmente.

Trouw a pone e siguiente titular: 'Ménos sálu den kuminda ta skapa bida di basta hende'. Diariamente e Hulandes promedio ta kome nuebe te dies gram di salu den su kuminda, kos ku mester ta seis gram, segun Konseho di Salubridat hulandes. Si tur dia ingerí tres gram ménos di salu pa persona, esaki ta evitá sigur un 2.500 morto pa aña, asina Wageningen Universiteit a sinta kalkulá. Tin muchu salu, sobretodo den kuminda ku industria alimentisio a prosesá, manera por ehèmpel pizza, plato pa maikroweif, snèk, sòpi i sòus. Hopi biá e konsumidó no sa ku e ta ingerí demasiado salu. Ta p'esei Hulanda lo haña un 'Taskforce Zout', ku lo boga pa redusí nivel di salu den produkto alimentisio.

Komo ku frialdat di wenter ta durando hopi tempu kaba, plaga ta invadiendo siudatnan na Hulanda. Djaka ku ratón ta okashonando molèster den bario. Ultimo tempu empresanan ku ta eradiká plaga i pèster ta risibiendo un avalancha di petishon pa kaba ku e bestianan, asina un bosero di e organisashon di gremio a bisa den deklarashon pa Spits. Esun ku no tin sèn pa paga un empresa ku ta kombatí pèster profeshonalmente ku ratisida, por buska un pushi pa kaba ku nan, esaki ta e tep ku e organisashon a duna lesadónan di Spits.