For di promé di yanüari 2010 ta kastigabel na Hulanda pa drenta den kontakto ku mucha, i laga nan kometé aktonan deshonesto riba énternèt, manera por ehèmpel riba Hyves, un sait ulandes ku ta di kompará ku Facebook. En bista di esaki polis di Amsterdam lo pone dos reshèrshi rib'e asuntu, pa nan indagá bai en buska di sobretodo hòmbernan riba énternèt, ku ta kulpabel di sedukshon di mucha. E notisia akí a sali den De Volkskrant. E reshèrshinan lo dal bai ku tapmentu di énternèt: si ta sospechá un persona e ora ei por sigui su movishonnan kompletamente komo usuario di énternèt.

Algemeen Dagblad ta informá ku kastigu pa maltrato di bestia lo bira mas severo. Mayoria miembro di parlamentu ulandes ta apoyá un proposishon di lei di inisiativa. Aki poko ten un persona, ku mara su kachó n'un palu di mata djis promé k'e bai ku fakansi, no tin mag di tin bestia mas pa por lo ménos dies aña. Anto esun ku maltratá un animal seriamente por bai será tres aña.

De Telegraaf ta duda di e asuntu di kèintamentu di klima mundial. Sientífikonan merikanu a deskubrí, ku e kantidat di sentro meteorológiko na mundu a baha di 6000 bira 1500 entre 1990 i 2010. Esaki ta pone ku temperatura pegá ku Polo Norte, na kunuku i na e regionnan den seru no ta konta mas den e kalkulashonnan di temperatura na mundu. E nivel di temperatura a para bira muchu mas haltu for di 1990, kompará ku e añanan anterior.

Nederlands Dagblad ta skibi ku partido VVD ke pa legalisá kultivo di mariwana, si oumentá e kastigu pa eksportashon di e yerba. Awor ku VVD tambe ta pro, ta formando un mayoria den parlamentu ulandes ku ke legalisá kultivo di hash pa merkado ulandes. Awe Tweede Kamer ta debatí riba maneho di asuntunan di droga.

Nos ta birando mas i mas bieu. Sientífikonan no ta mirando un fin na subida di edat di e ser humano, asina Algemeen Dagblad ta skibi awé. At'awó Kuba ta kleim di tin un siudadano k'a bati rèkòrt, un dama di 125 aña di edat, loke ta nifiká ku e ta e persona mas bieu na mundu. E kos akí no ta straña Rudi Westendorp, profesor di geriatria niun tiki. 'Si kos sigui asínaki, e or'ei aki un siglo hende por alkansá un promedio di edat di 110 añ', asina e la bisa. E motibu mas importante, segun Westendorp ta e echo ku nos ta konservá nos kurpa mió i ku nos no ta muri asina asina mas manera antes.

Den De Pers a sali un entrevista ku Christian Scott, un trompetista yòn di desendensia afroamerikano. E supertalento no tin miedu di trese su puntonan di bista dilanti den su músika, por ehèmpel enkuanto matrimonio homoseksual. Si e mes ta gay, e no ke bisa. 'Pero ta straño sí ku hende ta prekupá asina tantu ku pareha ku ke konviví ku otro pasó nan stima otro', asina e di.

Por lo ménos mil piská tropikal di èks kampion di bokseo Steve de Veth a her'i muri. E notisia akí a sali den Algemeen Dagblad. Kompania di energia a kita koriente den su nogoshi pa motibu k'e tabata debe nan. Ora lus a bai, e temperatura di awa di e akuario a baha. Piskánan ekstraordinario manera Piranha i Neon Tetra a her'i stek. Un nogoshi ku ta bende akuario na Rotterdam no por a soportá e miseria mas i a disidí di fangu e piskánan i tuma nan pa tanten.