Algemeen Dagblad kièrsa ku e aña akí sí wer di wenter por pone miles di obrero di industria di konstrukshon pèrdè trabou. E empresanan di konstrukshon, o sea nan dunadó di trabou, no por tuma enkargo ni pedido mas, pero nan mester sigui paga personal sí. Sobretodo e empresanan ku ta ofresé trabou di mètsla i ku ta pega blòki ta den pèrtá aktualmente, meskos ku esnan ku ta kubri dak, pone panchi, etèrnit k'eseinan. Wim van der Maas, direktor dje federashon di kontratista Nederland Bouw en Infra a bati alarma: 'Si sigui vris un siman mas, e or'ei sentenares di kompania lo hundi i miles di trahadó di konstrukshon lo keda sin trabou', asina Van der Maas a bisa.

Algun direktor di skol di VMBO ta teme ku pa un parti di nan alumno apénas ta posibel pa haña un diploma den futuro. E notisia akí a sali den Trouw. Loke ta pasa ta ku gabinete ke bin ku eksigensia nobo pa nivel di idioma i di aritmétika pa kada tipo di skol. E nivel ku ta rekerí di mucha di skol di VMBO ta e loke tur siudadano mester tin pa por funshoná den komunidat, segun gabinete ulandes. Pero e direktornan di VMBO ta kleim, ku pa hopi alumno e nivel ei ta muchu haltu.

Mayoria Hulandes ku a sondia, o sea 65 porshento ta kere ta importante pa eduká mucha di un forma mas severo. Spits ta informá ku mayoria mucha yòn mes ta di akuèrdo ku esaki. Awendia supuestamente no ta pone 'sufisiente límite na komportashon di mucha'. E falta di kontakto i tempu den hogar ta un punto di prekupashon, tantu serka mayor komo yu.

Aruba lo haña liña di trèm o trambía. E notisia akí a sali den De Telegraaf tambe. Promé minister Mike Eman a bisa den deklarashon pa e korant, ku no mas tardá ku aki mèi aña lo mester start ku konstrukshon di e trayekto di trèm. E ruta ta supos di bira por lo ménos tres kilometer di largura i e mester keda kla na 2012. Aruba mes lo paga pa e medio di transporte nobo akí, pero e pais ta koperá sí ku HTM, e kompania di trèm di Den Haag. E liña di trèm lo kore di haf te den sentro di Oranjestad na Aruba.

Jesse Jackson, e konosido dòmi i aktivista merikanu pa derechi di hende ta bisa ku ta bayendo bon ku demokrasia. Trouw ta skibi ku último 60 aña mas i mas hende ta envolvé den demokrasia, segun Jackson antó. E ta haña ta positivo tambe ku dirigentenan ta opservá mundu eksterior mas i mas, i e ta gaba presidente Barack Obama mashá. Mañan Jackson ta duna un charla na Den Haag tokante integrashon di gruponan di poblashon.

Algemeen Dagblad ta kere ku ministerio di Defensa a manda kapitan Marco Kroon ku 'buitengewoon verlof'. No ta konosí pa kuantu tempu. Lo no ta trata di un 'schorsing' tampoko. Ta sospechá Kroon di narkotráfiko den su bar na Den Bosch. Poko ten pasá el a risibí Militaire Willemsorde, e kondekorashon mas haltu den militarismo ulandes, pa su servisio prestá na Afganistan.

Un biudo ta muri mas lihé ku un biuda. Esaki ta algu ku Vrije Universiteit di Amsterdam a investigá i ku a sali awé den De Volkskrant. Un biudo tin mas chèns di fayesé ku un biuda komo ku e no ta dje bon ei den mantenshon di kontakto sosial, asina ta ku e ta keda so mas lihé. Biudanan sí ta keda den kontakto ku amistat i famia.

De Volkskrant ta skibi tambe ku djawó padilanti fornikashon ku bestia i produkshon òf poseshon di pornografia ku animal ta kastigabel. Ayera Eerste Kamer, o sea Senado ulandes a aseptá un proposishon di lei al respekto. Ta dikta kastigu di prizòn di un añ'i mei pa esun ku kometé 'aktonan deshonesto' ku bestia. Hulanda ta un produsente grandi di pòrno ku animal.