"No ta na Hulanda pa influenshá e proseso na Boneiru relashoná ku e referèndum, ku gobièrnu di e isla ke tene. Esaki segun Cynthia Ortega-Martijn, miembro di parlamentu hulandes pa partido ChristenUnie.
Ortega-Martijn ta reakshoná riba e echo, ku Boneiru no a partisipá aktivamente na e deliberashon gubernamental entre Hulanda i Islanan BES, ku a tene na Kòrsou djamars, 3 di novèmber.

Boneiru tabata presente sí, pero e isla no a firma e lista di palabrashonnan hasí. 
E isla antiano ke warda resultado di e refèrèndum di 15 di yanüari di otro aña, promé ku sigui ku e negosiashonnan.

Ortega-Martijn: "Tratadonan internashonal di Nashonnan Uní ta stipulá ku un pueblo tin derechi di indiká si nan ta di akuerdo ku e manera ku e proseso ta bai òf no. Gobièrnu boneriano a pidi konseho serka wes Bob de Wit. Gobièrnu a risibí e advies. No ta na nos aki na Hulanda pa bisa kiko nos ta haña di e rekomendashon di señor Wit."

Wit a skirbi un dokumento konsultativo pa Partido Demokrátiko Boneriano, relashoná ku e proseso di struktura estatal, kaminda entre otro Konseho Insular a disidí unánimamente ku mester bini un referèndem.  Den e dokumento Wit ta kuestioná tambe aktitut di Hulanda, ku ta hole loke nan ta yama na ingles 'scare tactics' i 'bullying practices', esta táktika i práktikanan pa spanta, menasá i dominá. E ta spera ku un pais manera Hulanda, ku ta respetá su mes i di renombre internashonal, lo no hasi uso di nan.

Ortega-Martijn ta di opinion ku si pueblo di Boneiru rechasá e palabrashonnan hasí, mester bolbe papia ku Hulanda. Bijleveld i algun parlamentario a bisa ku si kambia kos atrobe, e ora ei no ta negoshá mas. Ta keda ún opshon so, i esei ta independensha. Pero esaki no ta na Hulanda pa disidí esaki, atrobe segun resolushonnan internashonal.

Sekretario di estado hulandes Ank Bijleveld a presentá vários opheshon kontra e ofresementu di un alternativa konstitushonal en general, i kontra esun di asosiashon liber en partikular. E ta warda wak ki resultado e referèndem lo duna. Turesten e lo sigui deliberá ku Statia i Saba riba leinan relashoná ku nan futuro státùs di munisipio ekstraordinario di Hulanda.

Skucha e entrevista di Leila Wijnhoven ku Cynthia Ortega-Martijn