Raymond Labad, presidente di fundashon MAAPP, ta aploudí e echo ku minister hulandes Van der Laan ke yuda kambia imágen negativo di Antiano na Hulanda. Esaki a bin dilanti den un reunion di komishon fiho di parlamentu hulandes tokante hóbennan antiano problemátiko. Parlamentario Cynthia Ortega-Martijn di ChristenUnie a pidi e reunion pa papia di e imágen negativo ku Antianonan tin na Hulanda. 

Raymond Labad di Movementu Antiano i Arubano pa Promové Partisipashon (MAAPP ta positivo. E ta haña ku porfin minister Van der Laan a tuma tempu pa siña mas di e komunidat antiano. "E vishon a kambia i MAAPP ta dispuesto pa koperá pa drecha e imágen negativo di e Antiano", Labad ta bisa.

El a agregá mas aleu ku mas ku 90 porshento di e Antianonan ta funshoná perfektamente den komunidat hulandes. "Pero mal notisia ta notisia i esaki ta konta pa Hulanda tambe", segun Labad. E ta sigui bisa ku ora Antiano kometé un delitu, e ta sali den notisia pero ora e hasi algu bon, niun hende no ta sa.

E asuntu di PVV
Labad ta di opinion ku PVV ta un partido ku un sistema populista. "Nan ta kresiendo debí na fayo di otro partidonan." Raymond Labad ta sigui komo presidente di MAAPP. E movemento ke hasi Antianonan polítikamente mas konsiente pa nan bai vota. Por ehèmpel, pa bai vota dia 3 di mart pa elekshon di konsehonan munisipal na Hulanda.  "Pa evitá ku tipo di polítikonan populista asina haña mas poder den munisipionan", segun Labad.

Skucha Raymond Labad den kòmbersashon ku Scarlet Windster.