Movementu Antiano i Arubano pa Promové Partisipashon, MAAPP, ta studia e posiblidat pa bai korte di hustisia oropeo na Luksemburgo òf korte oropeo pa derecho humano pa apelá e lei yamá 'Verwijsindex Risicojongeren (VIR). Siman pasá Senado hulandes, esta Eerste Kamer, a aseptá e lei. Pero segun presidente di MAAPP, Raymon Labad, ora registrá hóbennan antiano pa nan haña ayudo por konkluí ku ta trata di antiano.

Segun Raymond Labad MAAPP no ta kontra di VIR. "Nos ta na fabor di un sistema ku no tin registrashon a base di etnisidat. Sí nos ta kontra si inkluí e parti di registrashon a base di etnisidat." Eerste Kamer a aseptá e lei di VIR a pesar di konsehonan di Raad van State i dje kolegio di protekshon di datonan di persona, segun Labad. MAAPP a keda sorpresá ku ChristenUnie i PvdA a bai di akuerdo ku e lei manera e ta awor.

Konsekuensha negativo
Registrashon manera lo bai sosodé awor lo por tin konsekuenshanan negativo pa hóbennan antiano. E ta bisa esaki pasobra ta un kordinadó antiano lo mester registrá hóbennan antiano pa nan haña ayudo. Labad: "Na momentu ku bo wak un registrashon hasí pa e kordinadó, bo sa ku ta trata di un antiano. Nan por bisa hepa ta un antiano, esei mi no ke." Dje manera ei por perhudiká e hóbennan antiano den dunamentu di ayudo, asina Labad ta bisa.

Apelashon
MAAPP ta kompletamente kontra dje sistema di registrashon kaminda por saka afó ki nashonalidat e hóbennan tin. Pa e motibu ei e organisashon ta studiando huntu ku ekspertonan i ku Ocan, e órgano di konsulta pa hulandes karibense, pa wak ki otro paso por tuma kontra dje lei VIR, manera e ta awor.