Despues di nuebe luna difísil grupo di baile Expreshon Kultural a organisá djasabra 30 di yanüari e sho 'It's time 2 Express' den misa Goede Rede na Almere. Pa promé biá despues dje tragedia riba Dia di Lareina 2009 na Apeldoorn e grupo a presentá huntu atrobe.

Un miembro dje grupo a pèrdè su bida durante e atentado riba famia real i diferente otro miembro a sufri heridanan serio. Tur esnan presente a rekordá Wilfrido (Frido) Plantijn ku a fayesé dia di Lareina na Apeldoorn. 'Semper lo e keda presente den nos kurason', asina lider dje grupo Sidney Stacie a bisa na komienso dje sho. Yu hòmber di Wilfrido, Rick Plantijn a baila un wals ku su kasá Ines na honor di Frido.

Satisfecho
E anochi tabata eksitoso pa e integrantenan dje grupo i tambe pa tur otro persona, famia i invitadonan. Aparte dje aktuashon di Expreshon Kultural tabatin entre otro gruponan di kanto, algun artista hóben i tambe guest star Junior Anzola a duna un presentashon. Isora Leal, ku a sufri herida serio dia di Lareina ta satisfecho i kontentu ku e manera ku e anochi a bai. Isora Leal: "Mi ta kontentu kon pueblo di Hulanda henter a sostené nos." Isora Leal a sufri hopi herida, prinsipalmente na su pianan, pero ya ta kana atrobe sin niun sosten. "Mi tin problema ku e rudia só ainda. A bisámi ku señal di mi serebro mester bai pa mi rudia."

Still going strong
Tambe Oniela Leal, ruman muhé di Isora, tabata presente durante 'It's time 2 Express'. Isora, Oniela i Rudsel Haddocks, ku tambe a sufri herida serio despues dje atentado, tabata maestro di seremonia e anochi memorabel di nan promé sho despues di nuebe luna difísil. Oniela Leal tabata emoshoná na komienso dje anochi pasobra ainda e ta den ròlstul i no por baila. "Pero tòg ora mi a wak kon e grupo a baila i kon e anochi a bai, mi ta kontentu. Mi a gosa un mundu den mi ròlstul. Expreshon Kultural is still going strong. Nos a lanta para bèk riba nos pia i awor nos ta sigui bai."

Rekuperashon di Rudsel Haddocks i di tres integrante di Expreshon Kultural, ku a sufri herida serio, ta bai bon. El a pasa den un temporada hopi difísil. "Mi ta bezig ainda ku mi revalidashon. Pero e ta bai den bon direkshon. Haddocks lo a presentá pa di promé biá ku e grupo di baile dia di Lareina, aña pasá na Apeldoorn. Haddocks: "Lo tabata promé biá ku lo mi a presentá ku e grupo. E no por a tuma lugá pa motibu dje aksidente. Ounke mi no por presentá awe, tòg mi ta sintimi kontentu ku mi ta mira e grupo mes baila pa nos. Pasó nos ta uní den grupo. Ora nan ta presentá mi ta sinti mi mes ta presente bailando na e momentunan ei."