Den ún siman di tempu Marechaussee na Schiphol a detené dos hende ku un kantidat grandi di kokaína. Ta trata di un muhé antiano ku droga den su kurpa i den bruki di su yuchi i un hòmber sürnameo ku a guli 2.2 kilo di bolita.

E dama antiano, ku a bula di Kòrsou pa Hulanda tábatin poko mas ku un kilo di droga, parsialmente skondí den bruki di su yu. El a ninga di koperá ku un bodyscan voluntario komo ku e por ta na estado. Despues di investigashon mas aleu a haña droga den nan kurpa.

Robert van Kapel, bosero di Koninklijke Marechausse a keda sorprendí ku a haña droga den bruki di un yu di dos aña: " Ta skonde droga na tur manera, ma ta un eksepshon grandi ku ta skonde esaki den un bruki. Esei si a spanta nos."

Rèkòrt
E hòmber sürnameo ku a detené ku 182 bolita di kokaína, tin e onor dudoso di kibra rekòrt di gulimentu di bolita. E bolitanan ku el a guli manda abou tabata pisa 12 gram kada un, loke a bai para den kasi 2.2 kilo.

Van Kapel: Mi koleganan a spanta ora nan a haña asina tantu kokaína den un kurpa. Bo ta kore un riesgo enorme i kòntròl sa ta skèrpi. "Airopuertonan ta kòrdina nan kòntròl ku otro, pero ainda tin hende ku ta purba. "E no ke revelá identidat di e sospechoso. Rumor ta kore ku e gulidó ta un artista di e grupo A Sa Go.