For di tempu ku e tabata chikí, e tabata puntra su mes yen di kos tokante bida i e mas ayá. Su inkietut interno a para bira un afan, un búskeda tenas pa sa e pakiko di tur kos. Jennifer Gomperts ta diseñadó gráfiko i outor antiano na Hulanda.

Jennifer Gomperts a nase na Kòrsou na 1965. El a muda bai Hulanda na 1983. Fo'i mucha Gomperts tabata gusta lesa kòmeks. E tabata lesa delaster un ku e por a haña i tabata purba di pinta nan tambe. E diseñadó gráfiko antiano ta sigui splika, ku e no tabata sa ku e profeshon ku e ta ehersé awor tabata eksistí. Esta, ku tabata tin un estudio pa siña i bira diseñadó gráfiko.
"For di mi dos aña mi tabata pinta hende kaba, pero mi no tabata pinta nan bon. Mi tabata pinta un rònchi ku dos palu abou i despues mi a sigui desaroyá mi mes", segun Gomperts.

Inspirashon pa pinta
Jennifer Gomperts ta haña inspirashon na diferente manera pa realisá su obranan di dibuho. Su inspirashon ta bini ora e ta analisá hende, pero tambe ora e soña un kos òf mira algu na televishon e ta haña ideanan kreativo. Músika tambe ta un fuente di inspirashon pa e diseñadó gráfiko antiano. Gomperts a skohe e piesa Isaac di Madonna por ehèmpel pa ilustrá kiko e ke men. "E ta 'sinfonisch' plùs e tin un 'beat' su tras; e ta duná'bo mané un 'rùsh'. Bo ta sintíbo mané bo ta bai den un otro esfera", asina Jennifer Gomperts ta splika.

Olamot
Jennifer Gomperts ta outor di e kuenta gráfiko Olamot. E obra akí ta úniko den su sorto, no solamente pa e echo ku ta un kuenta gráfiko, pero tambe pasó e ta e promé un ku ta skibí kompletamente na papiamentu. Hopi hende ta suponé ku ta trata di un kòmeks òf kartun. Gomperts ta splika ku tin un diferensha grandi entre kòmeks i kuenta gráfiko. Kòmeks ta un kuenta chistoso, miéntras ku un kuenta gráfiko ta un istoria serio. E obra gráfiko Olamot di Gomperts definitivamente nó ta kòmeks. E ta un istoria serio, basá riba místika hudiu di Kabbala, ku ta konta kon vários faktor den bida por stroba búskeda spiritual di hende.

Soñonan
Jennifer Gomperts ta konta ku e tin idea di saka mas kuenta gráfiko, pero e no sa sigur si e lo publiká nan tambe na papiamentu. "Segun mi e lesadónan di papiamentu no ta mashá amante dje género ku mi t'aden", segun Gomperts. E diseñadó gráfiko no ta laga esaki demotiv'é. Su soñonan ta bibu i den estilo di fantasia kaminda e mes ta hunga un ròl. Jennifer Gomperts: "Ora mi lanta fo'i soño, mi ta sinti un gana enorme di bisa: okei, awor mi ta bai skibiele anto mi ta bai pinta un 'strip' di dje".

Empresa chikí
Gomperts ta disponé di un gran kantidat di hèrmènt i medio tékniko pa duna su kreashon un forma adekuado. El a studia 'Media-Technologie' (Teknolohia pa Media) na Hilversum i Diseño Gráfiko na Amsterdam. E ta Master of Arts tambe den 'Image Synthesis and computeranimation' (Portsmouth University, Inglatera). For di tempu ku el a kuminsá studia, e ta independiente: e ta doño di su mes empresa chikí komo diseñadó/ilustradó i el a diseñá i traha wèpsait eksitosamente pa un gran kantidat di nogoshi. E ta hinka un wèpsait den otro di tal manera, ku e usuario ku hasi un bishita no ta hañ'é ku paso ni trámite kompliká.

Pa mas informashon tokante aktividatnan di Jennifer Gomperts por bishitá: www.caribmotion.com