Boletin di Notisia di 12or di mèrdia

Jesse Jackson no gusta segregashon den enseñansa ulandes
Jesse Jackson, dòmi i alabes aktivista pa derechi sivil na Merka ta haña ku Hulanda mester atendé ku segregashon den enseñansa. Segregashon mester bira ilegal i inaseptabel, asina Jackson a bisa den un entrevista ku Wereldomroep. Prinsipalmente na skol básiko ta importante pa mucha drenta den kontakto ku otro pais i kultura. Mester konsiderá imigrante komo balor adishonal, no komo menasa, segun e dòmi merikanu. Jesse Jackson ta na Hulanda. Djaweps, o sea antiayera el a tene e charla ku ta hiba nòmber di Martin Luther King.   

Komité nashonal pa prepará selebrashon di 200 aña di independensha ulandes
Minister di Estado i èks promé minister ulandes Ruud Lubbers lo bira presidente di Nationaal Comité 200 jaar Koninkrijk der Nederlanden. Ayera djabièrnè Konseho di Minister a disidí di lanta e komité. Di 1813 te 1815 a pone fundeshi di Reino ulandes. Na 1813 Hulanda a bira independiente atrobe despues di e dominio franses. Na 1815 a introdusí monarkia konstitushonal ku inougurashon di rei Willem I. E festividatnan relashoná ku e hubileo lo dura pues dos aña, di 2013 te 2015. E komité bou di direkshon di Ruud Lubbers, lo prepará selebrashon di independensha i di institushon di Reino ulandes.

Konsulado ulandes na Atlanta ta duna visem atrobe
Konsulado ulandes na Atlanta ta duna visem atrobe, despues ku habitantenan ulandes di e siudat merikanu a keha debí na paro di e servisio akí. Nan a hasi esaki pa medio di e programa Expat on Air di Wereldomroep. Aña pasá ministerio di Asuntunan di Eksterior a disidí ku konsuladonan, ku ta emití ménos ku 500 visem pa aña mester stòp ku e servisio. E denunsiantenan ulandes a mustra eksitosamente riba importansha di emishon di visem na Atlanta. Na Merka ofisina prinsipal di empresanan ulandes manera Randstad, Rabobank i Stork ta establesé na e siudat. Multinationals manera Coca Cola i UPS tambe tin nan 'headquarters' na Atlanta. Empleadonan di e kompanianan akí ta biaha hopi mediante visem di tránsito via Schiphol pa otro destinashonnan na mundu.

Transporte di plaka na Hulanda ku kompaño di polis
Na Amsterdam a disidí ku por lo pronto lo ofresé kompaño polisial na transporte di plaka. Outo di polis lo eskoltá tur transporte di sèn. E motibu ta oumento di e kantidat di atrako. Luna pasá mes a asaltá kuater transporte di sèn. Antiayera dos intento di atrako a frakasá. Mas i mas ta usa violensha durante e asaltonan. Poko tempu ei mes a basha gasolin riba dos empleado di transporte monetario i a menasá di pega nan na kandela. Tabatin palabrashon hasí kaba di eskolta polisial, pero despues di e suseso di djaweps último, a adelantá e medida.

Registro nashonal di penshun entrante otro aña
Entrante otro aña lo introdusí un registro nashonal di penshun. Gabinete ulandes a bai di akuèrdo ku e sistema akí. Hendenan por chèk riba énternèt kuantu a spar pa penshun di behes, esta pa AOW i pa penshun komplementario. Dje manera akí nan ta haña un mió bista di nan provishon di behes, asta si nan a yega di tin vários dunadó di trabou. SVB, o sea banko di seguro sosial ku ta ehekutá AOW, i tambe fondonan di penshun ku ta responsabel pa penshun komplementario mester entregá e datonan n'e registro nashonal. Ta e hendenan konserní so por wak e datonan.

Tormenta di sneu na Merka
A rekomendá habitantenan di Washington, kapital di Estados Unídos pa keda kas awé pa motibu di un tormenta di sneu ku ta ras na ost di e pais. Meteorólogonan ta pronostiká, ku despues ku e tormenta pasa lo keda un kapa di sneu atras di 75 sèntimeter, loke lo nifiká un rèkòrt atrobe. Hopi skol, instansha di gobièrnu i empresa a sera pa duna hende chèns di yega kas. Na hopi supermerkado no tabatin ni pan ni tampoko lechi mas na benta, antó aparato pa hala sneu i 'flashlight' a kaba tur kaminda. E wer ta stroba tráfiko na ost di Estados Unídos mashá. Tabatin vários desgrasia riba kaminda i a kanselá basta buelo.

Pida hala di Boeing a kibra na Miami
Pida hala di un Boeing di transporte a kibra djis promé ku aterisahe na airopuerto di Miami. Plachi di material sintétiko, tamaño di un outo, a bai resultá na un lugá di stashoná vehíkulo pegá ku'n supermarket. No tabatin erido ni daño. E avion tipo Boeing-Atlas por a aterisá despues sin ningun problema. Outoridatnan di aviashon merikanu ta investigando e asuntu mas aleu.

Tempestat na Méhiko
E tempestat ku a ras na partinan grandi di Méhiko a eksigí bida di por lo ménos 28 hende último dianan k'a pasa. E mal tempu a asotá sobretodo Michoacán, un estado ubiká na wèst di Méhiko. Na algun region a dekretá estado di emergensha. Na Siudat di Méhiko tin yobidanan torensial. Riunan na e kapital mehikano a desbordá i inundá partinan di e siudat di miones di habitante.

Deporte-futbòl di promé divishon na Hulanda
NAC di Breda a derotá Willem II di Tilburg ku skor di 2 pa 1 den wega di promé divishon. Edwin de Graaf i Matthew Amoah a hinka e golnan pa NAC, miéntras ku debutante Mitchell a hinka e promé i úniko gol pa Willem II. NAC a pasa FC Utrecht i awor e ta pará na puesto number seis, despues di su di nuebe triunfo den promé divishon.

Pronóstiko di tempu:
Awe tin mest, o sea neblina na Hulanda i debésenkuando awa òf sneu ta chip. Solo ta bria ratu ratu den zùit. Temperatura ta 2 grado na Groningen i 6 den zùit. Mañan solo ta bria debésenkuando i temperatura lo baha un tiki asina.