Boletin di Notisia di 12or di mèrdia

Promé minister antiano de Jongh-Elhage na Haiti
Promé minister Emily de Jongh-Elhage a bishitá Haiti den kompania di minister di tráfiko, Maurice Adriaens i di famia di e dos Yu di Kòrsounan ku a fayesé den e temblor na Haiti. Presidente haitiano René Préval a risibí e mandatarionan i nan komitiva. Despues e delegashon antiano a pone un bukèt di flor na Hotèl Montana, kaminda a haña kurpa sin bida di Angelo Isenia prinsipio di e siman akí.  Defuntu Isenia tabata inspektor di servisio di aviashon antiano. Ainda ta buskando paradero di Siegfried Francisco, direktor di e servisio. Un dje dianan akí lo hiba restu mortal di Angelo Isenia Kòrsou.

Hopi morto i erido na Haiti
E temblor na Haiti a eksigí bida di mas ku 200.000 hende. Promé minister Bellerive di Haiti a partisipá e notisia akí. E kantidat bèrdadero di víktima ku a peresé ta muchu mas, segun e mandatario. No a inkluí esnan ku ainda ta bou di e ruinanan ni tampoko e fayesidonan, ku famia mes a dera. Bellerive a bisa tambe ku tin por lo ménos 300.000 erido, entre nan mas o ménos 4000 ku mester a someté na operashon pa amputá pia ku brasa. Gobièrnu di Haiti ta kalkulá ku por lo ménos 250.000 kas a basha abou, mayoria di nan na kapital Port-au-Prince.

Komishon di Senado ta respaldá presidente argentino Kirchner
Presidente argentino Cristina Fernández de Kirchner a gana e promé tanda den e konfrontashon polítiko enkuanto e manera ku tin ku paga bèk loke Argentina debe den eksterior. Fernández de Kirchner a risibí apoyo di un komishon di Kongreso argentino den su intentonan pa paga ku bono, hasiendo uso di 14 porshento di reserva di dòler di banko nashonal. Ademas di esaki e komishon ta respaldá su desishon di poko ten pasá, esta pa retirá Martín Redrado, presidente di banko nashonal di Argentina. Redrado ta kontra e plan di Fernández de Kirchner, pues siman pasá djabièrnè e mes a entregá retiru. Redrado a splika ku e plannan di e presidente ta pone ku por hasi i deshasí ku sèn di spar di e Argentinonan. E siguiente opstákulo ku Cristina de Kirchner tin ku enfrentá ta un debate den Kongreso argentino prinsipio di otro luna.

Cramer di Medio Ambiente no ke eror ambiental mas
Minister Jacqueline Cramer di Medio Ambiente no ta tolerá eror mas den rapòrtnan ambiental. E mandatario ulandes a bisa e sientífikonan e kos akí, esta esnan ku a skibi e rapòrt anual titulá 'Estado di Klima'. Ultimo ten a deskubrí detayenan inkorekto den vários investigashon internashonal di klima mundial. E siman akí revista Vrij Nederland lo revelá un fayo nobo. Den un rapòrt di Nashonnan Uní di 2007 tin pará ku mas ku mitar di Hulanda ta bou di nivel di superfisie di laman, siendo ku en realidat ta trata di un pida muchu mas chikí, mas o ménos un kinta parti di e pais. Cramer a papia ku sientífikonan ulandes riba e erornan deskubrí.

Obama ke medida komersial riguroso kontra China
Presidente Barack Obama ta bisa ku lo e tèkel China ku muchu mas rigor riba tereno komersial. El a anunsiá ku lo e pone basta preshon riba China pa e pais habri su merkado pa empresanan strañero. Obama ta bin ku e ekspreshonnan nobo nèt awor ku e relashon entre Merka i China ta mas pésimo ku nunka. China ta hostiná ku Obama, komo ku e presidente merikanu tin intenshon di topa ku Dalai Lama, lider spiritual di Tibet, un provinsia rebelde di China. Tambe e plan merikanu, pa bende arma ku Taiwan na balor di miares di dòler ta algu ku gobièrnu na Peking no ta gusta niun tiki.

Tribón a ataká kitesurfer na Florida
Tribón a ataká un kitesurfer mat'é dilanti kosta ost di Florida na Merka. E atake a tuma lugá pegá ku Stuart Beach, n'e parti zùit di e estado merikanu. Bista di un vigilante dje playa a kai rib'e kitesurfer di 38 aña di edat i el a ranka sali mésora pa yud'é. Ora ku wardakosta a akudí ku boto n'e sitio den laman, a topa ku e hòmber rondoná di tribon. E tabatin diferente mordé i el a desmayá den awa. E vigilante di playa a kore ku e tribónnan i a hiba e kitesurfer hòspital, pero e víktima a fayesé debí na su eridanan.

Deporte-futbòl di promé divishon na Hulanda
PSV di Eindhoven a gana FC Utrecht ku skor di 2 pa 1 den wega di kompetensha di Promé Divishon na Hulanda. Ku e triunfo akí e ekipo di Brabant kétubai ta na kabes huntu ku FC Twente di Enschede, ounke mester bisa ku PSV su promedio di gol ta mió sí. FC Twente a derotá su rival regional Herácles di Almelo ku skor di 2 pa 0. E demas resultadonan: FC Groningen a bati ADO Den Haag, ku a laga mashá di deseá e biá akí. E skor tabata 2 pa 0. Ajax a kaba ku Roda JC ku 4 pa 0. Luis Suarez a hinka tur e kuater golnan. E partido di Sparta di Rotterdam kontra Vitesse di Arnhem a resultá den un empate, esta 1 pa 1.

Pronóstiko di tempu:
Debésenkuando áwaseru ta kai. Na nortost di Hulanda tin yobida di sneu i kisas áwaseru kongelá tambe, konosí komo 'ijzel'. Den kurso di dia ta seku i temperatura ta entre 4 i 7 grado riba sero.