Boletin di notisia di 12or di mèrdia

Kisas referèndum di Boneiru no ta sigui mas
E referèndum na Boneiru planiá pa 26 di mart próksimo ta tambaliá. Gezaghèber di Boneiru a pidi gobernador di Antia pa anulá e proyekto di lei tokante e referèndum. Segun e mandatario e plebisito ta en pugna ku leinan internashonal. T'asina ku Hulandesnan ku no a nase na Boneiru, i ku a establesé nan mes na e isla despues di 2007, no tin mag di vota. Ademas tin hopi diferensha di opinion den Konseho Insular riba e referèndum, siendo ku Nashonnan Uní a konsehá Boneiru pa sigui ku e konsulta popular solamente si tin konsenso. Ta sumamente eksepshonal ku un gezaghèber ta pidi gobernador antiano pa revoká un proyekto di lei. Gobernador Goedgedrag tin 30 dia di tempu pa disidi si e ta tuma e konseho di gezaghèber Thodé.  

Elekshon na Haití posponé
Na Haití nan a posponé elekshon parlamentario, planiá pa akí tres siman, pa tempu indefiní. Pa motibu di e kaos ku ta reina aktualmente na e pais, outoridatnan haitiano a disidí di posponé e elekshon, pasobra nan no por garantisá ku nan ta tuma lugá di forma honesto i seif. E elekshon tabata planiá pa 28 di febrüari i 3 di mart. Haitianonan por a eligí 99 miembro di parlamentu i un tersera parti di e 30 senadornan. Segun último kalkulashonnan mas o ménos 170.000 persona a pèrdè nan bida a konsekuensha di e temblor, ku a tuma lugá dia 12 di yanüari último.

Muhé kubano a kumpli 125 aña
Ayera un señora na Kuba a kumplí 125 aña di edat, asina e agensha di prensa kubano AIN ta informá. Juana Bautista Rodríguez, kende ta bon bon di salú, ta e muhé mas bieu na mundu, segun AIN. El a nase dia 2 di febrüari 1885 na e provinsia Granma, ubiká na e parti ost di Kuba, kaminda e ta biba ainda. E tabata e di dos di un famia di 13 yu. Di e tres yunan ku e mes a haña, unu ta na bida ainda. Juana Bautista Rodríguez tin 6 ñetu, 15 bisañetu i 4 bisa bisañetu. Grasias na e airu saludabel di kunuku e por a biba asina largu, segun Juana Bautista. Pero tambe e kuminda salú ku el a kome semper, entre otro wòrtel i karni, i un kurason yen di amor pa su próhimonan. Maske ku kranshi di e munisipio, kaminda e ta biba, ta bisa ku e ta disponé di un akto di nasementu legal di e señora, Guiness Book of Records no ta rekonosé e rèkòrt akí. Segun e buki di rèkòrt te ainda ta un señora merikano, Gertrude Baines, ta e persona mas bieu na mundu. Baines a fayesé aña pasá na edat di 115 aña.

Protesta kontra eksplorashon di zeta na Islanan Malvinas
Argentina i Gran Bretaña atrobe tin konflíkto ku otro tokante Islanan Malvinas. Buenos Aires a entregá un protesta fuerte na Londres kontra e eksplotashon planiá di zeta i gas  banda di e parti nort di e islanan. Den e zona di 200 mia rònt di e islanan tin reservanan grandi di zeta i gas ku ainda no a eksplotá. E luna akí mes Londres ke kuminsá bora komo prueba. Segun gobièrnu argentino, okupashon ilegal di e islanan no ta duna Británikonan e derechi di eksplorá awanan teritorial di Argentina en buska di zeta. Ademas, e plannan lo ta pugna ku resolushonnan di Nashonnan Uní, den kual ta hasi un yamada na ambos partido pa no tuma pasonan unilateral. Argentina ta konsiderá Islanan Malvinas, konosí tambe komo Falkland Islands, komo su teritorio. Na 1982 tabatin un guera breve pero intenso entre Argentina i Gran Bretaña, despues ku militarnan argentino a invadí e archipiélago. Den e guera 650 Argentino i 255 Britániko a pèrdè nan bida e tempu ei.

Terorista ta koperá atrobe
E Nigeriano ku a purba kometé un atentado den un avion na Detroit riba promé dia di Pasku di aña pasa, ta koperá atrobe ku investigashon di su persona. Direktamente despues ku a detené, el a deklará ku el a haña entrenamentu na Yemen, di un grupo ku tin lasonan ku al-Qaeda. Pero despues ku a kont'é ku e no tin nodi di komprometé su mes, el a keda boka será. Den prensa merikano ta spekulá ku ta su famia a konvensé pa e kuminsá papia atrobe. Segun FBI su deklarashonnan a duna informashon balioso. E detayenan no ta konosí ahinda. E hóben di 23 aña a subi avion na Schiphol rumbo pa Detroit. Bulando riba Detroit el a purba laga eksplosivonan, ku e tabatin pegá den su paña, rementá. Pero e intento akí a frakasá ora ku un pasahero, nasé na Kòrsou,  a intervení.

Homoseksualidat den ehérsito merikano
Trupanan merikano ta pone e promé pasonan ku mester kondusí na un kambio di kultura pa aseptashon di homoseksual den ehérsito. Asina e miltar di rango mas haltu, general Mike Mullen a bisa. Awóraki homoseksualidat den ehérsito merikano ta un tabú. Niun hende no ta puntra nada i muhé i hòmber homoseksual no ta papia di dje tampoko. Si un militar papia abiertamente di su homoseksualidat, e por pèrdè su trabou. Esaki ta reglá den un lei di 1993. E lei akí a remplasá esun ku tabata prohibí homoseksualidat den ehérsito eksplístamente. Siman pasá presidente Obama a hasi un yamamentu den su State of the Union pa kibra tambe ku e silensio tokante homoseksualidat den ehérsito.

Virginidat
Un studiante di Nueva Zelandia a bende su virginidat na findishi pa 32.000 dòler o sea 23.000 euro. E mucha muhé di 19 aña a pone un aviso riba wèpsait i need.com. Riba e sait akí e ta yama su mes 'unigirl' i e ta deskribí su mes komo un mucha muhé atraktivo, i e ta enfatisá ku nunka e no tabata seksualmente aktivo. Mas o ménos 1200 persona a reakshoná i a ofresé un suma pa kibra virginidat di e studiante, kende tin mester di plaka pa paga su estudio. Segun e studiante, nunka e no a kere di haña asina tantu plaka. Ainda e no konosé e persona ku a ofresé e suma akí.

Deporte-futbòl
Den e último minüt di wega AZ a pèrdè ayera kontra NAC Breda. Un kwart'i ora promé ku tempu a pasa, AZ a skor e promé gol. Pero djis promé ku wega kaba NAC a pasa di kantu i a skor e di dos gol den e wega. VVV Venlo a gana na kas di SC Heerenveen ku 3 pa 1. A posponé e bataya entre NEC i Willem II pasobra no por a hunga riba e fèlt. Pa e mes motibu, e wega entre FC Groningen i ADO Den Haag tampoko por a sigui.

Pronóstiko di tempu:
Dia a habri ku yobida di wenter, pero den kurso di dia a bira seku rònt Hulanda i asta  solo ta bria dushi asina. E temperatura ta mas o ménos 3 grado.