Den e kaso ku PAR logra forma gobierno i sigui ku e lokual a palabrá ku Hulanda, lo por desmantelá Antia entrante 10-10-10. esaki segun deklarashon di Cynthia Ortega Martijn, parlamentario pa ChristenUnie i miembro di komishon permanente di parlamento hulandes pa asuntunan antiano i rubiano.

Ortega Martijn a elogiá pueblo di Kòrsou i di Boneiru pa nan eskoho durante delaster elekshon pa Staten. segun e tabata difísil pa skohe. E ta haña tambe ku a base di viktoria di UPB na Boneiru, ku ta pro integrashon ku Hulanda, ta difísil konkluí ku den e referèndùm ku lo tene ainda pueblo lo skohe pa integrashon. 'Hopi biaha bo no sa kon un hende ta skohe' asina Ortega Martijn ta bisa. Fuera di esei ta asina ku e kantidat di hende pro òf kontra integrashon 'ta hopi serka banda di otro.' 

Si resultá ku no ta tur isla ta kla pa haña e status nobo entrante 10-10-10 mester wak kiko por hasi pa e islanan ku sí ta kla por haña e status ku nan a palbrá ku Hulanda.

Skucha Cynthia Ortgea Martijn den un entrevista ku Johan Oldenboom

Resultado di elekshon ta nifiká ku e kambionan estatal ta sigui entrante 10-10-10, esaki segun parlamentario John Leerdam di PvdA.  Pueblo di Kòrsou a skohe pa PAR kaba e trabou ku el a kuminsá kuné. Gobierno hulandes a yega di deklará ku lo e no bolbe negoshá e akuerdo ku tin riba mesa. Pero segun Leerdam e kos akí no a influenshá eskoho di elektorado antiano. E koalishon aktual den gobierno hulandes i esun promé kuné a enfatisá semper, ku lo no renegoshá e akuerdo final ku tin riba mesa. Esei ta pone ku no opstante impakto di krísis finansiero na Hulanda, lo sigui uza e sèn ku ta forma parti di akuerdo final pa e islanan i no pa invershon na Hulanda mes. Tur partido polítiko antiano ku lo bai forma parti di gobièrno mester pèrkurá awor pa guia e proseso di kambio den un bon rumbo,  esta segun Leerdam.

Skucha John Leerdam den un entrevista ku Johan Oldenboom.